Бельгиядә хореография мәктәбе үз репертуарына татар халык биюләрен керткән
Бельгиядә Belgian ballerinas хореография мәктәбе үз репертуарына татар халык биюләрен керткән. Мәктәп укучылары уку елы тәмамлану уңаеннан оештырылган хисап концертында өч композиция тәкъдим итте. «Бельгия татарлары» берлеге рәисе Лилия Вәлиева «Татар-информ» агентлыгына шулай дип белдерде.
Belgian ballerinas мәктәбендә шөгыльләнүчеләр татар мәдәнияте белән бер ел элек – аларның берсе, Амели Шмитц, «Шүрәле» балетыннан Сөембикә партиясен өйрәнеп, аны бер концертта тәкъдим иткәч танышкан. Бу эштә аңа Казан педагоглары ярдәм иткән.
Мәктәп вәкилләрендә татар биюләренә карата кызыксыну узган елның җәендә Татарстан башкаласының «Сәйдәш» театр-студиясе осталары Бельгиядә оештырылган Сабан туенда чыгыш ясагач уянган. Belgian ballerinas мәктәбе җитәкчесе Веерле де Шкрэйвер сүзләренчә, әлеге чыгыш аның өчен халык иҗатының бөтенләй яңа катламын ачу кебек булган. Ул «Сәйдәш» театр-студиясе солистлары Гүзәл Әхмәтҗанова һәм Евгений Никитиннан мәктәп укучыларын төп элементларга өйрәтүен һәм аларны чыгышларга әзерләвен сораган.
Нәтиҗәдә, кызлар «Казан сөлгесе» композициясен һәм «Чишмә» биюен өйрәнгән. Belgian ballerinas мәктәбендә шөгыльләнүче кызларга бию костюмнарын «Бельгия татарлары» иҗтимагый оешмасы тәкъдим иткән.