Миңнеханов ROCKWOOL Russia гендиректоры белән импортны алыштыру хакында фикер алышты
Татарстан Президенты Рөстәм Миңнеханов ROCKWOOL Russia генераль директоры Марина Потокер белән очрашты. Яклар Дания компаниясенең республикада урнашкан заводының эш перспективалары, шул исәптән импортны алыштыру һәм җитештерелгән продукцияне алга таба куллану мәсьәләләре хакында фикер алышты. Бу хакта ТР Президентының матбугат хезмәте җитәкчесе Лилия Галимова хәбәр итте.
«Халыкара вазгыятьнең катлаулы булуына да карамастан, сезнең компаниянең үз эшчәнлеген туктатмавы бик тә мөһим. «Роквул» 2007 елда «Алабуга» махсус икътисади зонасы резиденты статусын алды һәм бездә янмый торган материаллар җитештерү буенча Европадагы иң зур заводларның берсен ачты», - дип искәртте ТР Президенты.
Компания таш мамык нигезендә продукция әзерләү белән шөгыльләнә. Татарстандагы заводта җитештерелгән продукция республикада 16 зур объектны сафка бастырганда, шулай ук гражданнар төзелешендә кулланылган инде.
Миңнеханов һәм Потокер, аерым алганда, чит ил материалларын үзебезнекенә алыштыру юнәлешендә алып барылган эш хакында фикер алышты, минераль май җитештерүчеләрне (аларның продукциясе заводта сынау уза) сайлады.
Моннан тыш, алар компания тарафыннан җитештерелә торган материалларны күп фатирлы йортларга капиталь ремонт ясаганда, шул исәптән биналарның фасадларын җылытуда куллану мөмкинлекләрен карады.