Чулман елгасында баткан яшүсмерне водолазлар эзли
Бүген Чаллы шәһәрендә Чулман елгасында шәһәр комлыгы территориясе артында 16 яшьлек яшүсмер баткан. Бу хакта көндезге сәгать ике тирәсендә ашыгыч хезмәтнең 112 номерына хәбәр ителгән.
Фаҗига Яр Чаллы бистәсеннән ерак түгел урында булган. Шәһәр комлыгы каршында рельеф бар, ул берничә утрауга күчә. Алар арасын суда йөреп чыгып була.
Дүрт яшүсмер бер утраудан икенчесенә күчәргә булган. Әмма бу урында су агымы көчле булган. Ике яшүсмерне су агымы алып китә башлаган. Аларның берсе йөзү белән шөгыльләнгән һәм ярга якынрак йөзеп килә алган. Аңа дуслары кул сузган һәм судан чыгарган. Икенчесе су агымына каршы тора алмаган һәм баткан.
Фаҗига урынына 6нчы зональ эзләү-коткару отряды водолазлары килгән, алар яшүсмерне эзли.