Рөстәм Миңнеханов Якутия татарлары белән очрашты
24 июньдә Татарстан Президенты Рөстәм Миңнеханов Саха (Якутия) Республикасының татар иҗтимагый оешмалары вәкилләре белән очрашты, дип хәбәр итә ТР Президенты матбугат хезмәте.
«Сез тарихи Ватаныбыздан читтә яшәсәгез дә, милли үзенчәлекне, туган телне, мәдәниятебезне һәм халкыбызның гореф- гадәтләрен саклыйсыз», - дип мөрәҗәгать итте ул очрашуда катнашучыларга.
ТР Президенты чарада катнашучыларны Якутиядә үткәрелә торган Татарстан көннәре белән котлады. Ул ике республиканы этник тамырлар, телләр охшашлыгы һәм мәдәният бәйли, дип искәртте.
Рөстәм Миңнеханов төбәк җитәкчелегенә Якутиядә яшәүче сигез мең татар кешесе мәнфәгатьләренә игътибарлы булган өчен рәхмәт белдерде.
«Татарстан уңышларында Саха (Якутия) Республикасы белән сәүдә-икътисади хезмәттәшлек мөһим урынны алып тора. Бүген имзаланган килешүләр безнең төбәкләр арасында хезмәттәшлекне тагын да көчәйтәчәк», - дип билгеләп үтте Президент.
Очрашу ахырында Татарстан Республикасы Президенты «Татарларда кунакта» күргәзмәсендә булды.
Күргәзмә Алабуга дәүләт музей-тыюлыгы фондларыннан оештырылган һәм Саха (Якутия) Республикасының Милли сәнгать музеенда ачылган.