Табиб-психиатр сәламәтлеккә зыян салмыйча гына ялдан эшкә чыгу өчен киңәшләр бирде
Үз вакытында ял итү – үзеңне яхшы хис итүнең һәм нәтиҗәле эшләүнең нигезе. Әмма, һәр ялның ахыры була һәм кешегә эшкә кайтырга туры килә. Иртән иртүк уяну, тыгыз эш графигы, стресс һәм вакыт җитмәү эмоциональ төшенкелек китереп чыгарырга мөмкин. Сәламәтлеккә зыян салмыйча гына ялдан соң эш көннәренә әйләнеп кайту турында В. М. Бехтерев исемендәге РКПБ табиб-психиатры, гештальт-терапевты Оксана Захарова сөйләде.
Ялдан соң эмоциональ төшенкелекнең сәбәпләре төрле булырга мөмкин, диде табиб-психиатр.
«Мәсәлән, ял вакыйгаларга бик бай булган һәм психологик һәм физик яктан тулысынча ял итеп булмаган ди. Бәлки ялдан эшкә күчү дә кисәк булырга мөмкин. Яки ял вакытының җитәрлек булмавы да ихтимал. Болар барысы да субдепрессив халәткә китерергә мөмкин, ягъни хәлсезлек була, кәеф начарлану һәм тоткарлык килеп чыга», – диде табиб.
Әгәр алда саналган билгеләргә апатия, аппетит югалу, йокысызлык та өстәлсә, бу табиб-психотерапевтка мөрәҗәгать итәргә кирәк дигәнне аңлата.
Ялдан соң депрессия кичермәс өчен кайбер киңәшләрне истә тотарга кирәк. Беренчедән, бар нәрсәгә дә берьюлы тотынырга ярамый. Эшләрне мөһимлегенә карап кечкенә бурыч-максатларга бүлгәләргә һәм һичшиксез эштә тәнәфесләр ясарга кирәк.
«Икенчедән, хезмәттәшләр белән күңелле аралашу, узган ял турында сөйләшү дә эшкә кереп китәргә ярдәм итә. Бу эш мохитенә әкрен генә күчү була», – диде табиб-психиатр.
Шулай ук кешенең физик һәм психологик сәламәтлеге өчен йокы әһәмиятле урын алып тора. Төнлә 8 сәгатьтән дә ким йокламаска кирәк. Оксана Захарова сүзләренчә, бу кешенең психик сәламәтлегенең бик мөһим өлеше булып тора.
Моннан тыш, табиб ялдан атна ахырында – пәнҗешәмбе яки җомга көнне чыгу уңайрак диде.
«Ахырда үз-үзеңне кайгырту турында киңәш бирәсем килә – үзегезгә шатлык бүләк итегез. Көндәлек тормышыгызны уңай, рәхәт хис-тойгылар белән баетыгыз. Мәсәлән, кинога, театрга барырга яки якын кешеләрегез белән очрашырга була», – дип киңәш итте табиб.