Казанга Азия-Тын океан илләре товарлары төялгән контейнерлы беренче поезд китте
Владивостоктан Казанга Азия-Тын океан төбәге товарлары төялгән контейнерлы беренче поезд китте. Поезд 11 тәүлек килә, алга таба мондый составлар айга ике тапкыр йөриячәк. Беренче поездны тантаналы җибәрүдә Татарстан Республикасы Президенты Рөстәм Миңнеханов катнашты, шулай ук ул Владивосток Диңгез сәүдә портында да булды.
«FESCO Kazan Shuttle даими рейсы айга ике тапкыр Владивосток станциясеннән Тихорецкая станциясенә китәчәк. Татарстан Республикасында һәм Идел буендагы башка шәһәрләрдә автомобильдә алып китү мөмкинлеге була. Поезд айга 2 тапкыр җибәрелә һәм юлда 11 сәгать килә», – дип сөйләде Татарстан Президентының матбугат хезмәте җитәкчесе Лилия Галимова.
Шулай ук Рөстәм Миңнеханов FESCO линия-логистика дивизионы вице-президенты Герман Маслов белән дә очрашты. Компания Татарстанны Иделдә тышкы сәүдә агымнарының транспорт-логистика интеграциясен үстерү өчен перспективалы төбәк буларак карый.
«Безнең өчен бу хезмәттәшлекнең стратегик мәнфәгате бар. Татарстан Республикасында яхшы транспорт инфраструктурасы бар һәм без транспорт-логистика проектын тормышка ашыруда тиешле ярдәм күрсәтергә әзер», – диде Татарстан Президенты.
Ул компаниянең автомобиль һәм универсаль терминалларының эше белән танышты, «Цифровой двойник» проектын һәм аның башка эшләнмәләрен бәяләде.
Герман Маслов проектны тормышка ашыруда ярдәм күрсәткәне өчен Рөстәм Миңнехановка рәхмәт әйтте. Ул билгеләп үткәнчә, киләчәктә компания Татарстанга контейнерлы поездлар җибәрү ешлыгын арттырырга ниятли һәм шул рәвешле «Кытай, Азия-Тын океан илләре арасында Татарстан белән күпер» төзи.
Шулай ук Татарстан Президенты бу мәсьәлә турында «Дальневосточное морское пароходство» гаммәви акционерлык җәмгыяте директорлар советы рәисе Андрей Северилов белән дә фикер алышты.
«Бүген без беренче поездга старт бирдек, иң мөһиме ул тулган. Бүген җитештерү өчен логистика мәсьәләсе аеруча актуаль. Тагын да киңрәк карарга кирәк, Азия-Тын океан илләреннән тыш, Төркия, Иран базарларын да карарга кирәк», – диде Андрей Северилов.
Очрашу ахырында Татарстан Хакимияте һәм FESCO Транспорт төркеме хезмәттәшлек турында килешү төзеде.