Татарстанның 37 муниципалитетында салкыннар башланганчы җылылык җибәрелде
Салкыннар башланганын көтеп тормыйча, Татарстанның 37 муниципаль берәмлегендә җылы җибәрелгән. Хәзерге вакытта республикада 23,6 процент торак йортта, 54,3 процент мәктәптә җылы бирелә. Бу турыда Татарстан төзелеш, архитектура һәм торак-коммуналь хуҗалык министры Марат Айзатуллин ТР Министрлар Кабинетында узган брифингта әйтте.
Шулай ук 62,2 процент балалар бакчасында, 57,9% сәламәтлек саклау объектларында, 27,6% мәдәният учреждениеләрендә, 22,9% спорт һәм яшьләр оешмаларында, 42,4% социаль яклау объектларында җылылык бирелгән.
«Котельняларның 39,1 проценты эшли башлады», – диде Айзатуллин. Һава температурасы биш көн 8 градустан түбән торган очракта, ягып җылыту сезоны башланырга тиешлеген искәртте ул.
Шул ук вакытта җирле үзидарә органнары, салкыннар башланганчы, муниципалитетта җылыту сезонын башларга мөмкин. Беренче чиратта, социаль объектларга – хастаханәләргә, балалар бакчаларына, мәктәпләргә, картлар йортларына, интернатларга җылылык җибәрә ала.
Татарстанда беренче булып, 8 сентябрьдән Чирмешән районы җылылык җибәрде.