Татарстанда юл һәлакәтендә өч олы кеше һәм бер бала имгәнгән
Кичә 22.30 сәгать тирәсендә республиканың Югары Ослан районында Казан-Ульяновск юлында юл-транспорт һәлакәте булган. «Татар-информ»га шаһитлар хәбәр иткәнчә, «Лада Гранта» һәм Toyota юл бүлешә алмаган. Каты бәрелешүдән соң ике автомобиль дә юл кырына төшеп киткән.
Шаһитлар сүзләренчә, «Лада Гранта» автомобиленең йөртүчесе һәм пассажиры юл-транспорт һәлакәте урыныннан качып киткән.
«Медиклар ашыгыч ярдәм машинасында дүрт зыян күрүчене – ике ир-ат, хатын-кыз һәм алты яшьлек кыз баланы хастаханәгә алып киткән. Алар барысы да Toyota машинасында булган», - дип ачыклык кертте һәлакәт шаһитлары.