Авария булу сәбәпле Горький шоссесыннан Казанга керү юлы тулысынча ябылган
Бүген иртәнге алтылар тирәсендә Казанның Горький шоссесында, Аккош күле янында юл-транспорт һәлакәте булган. «Яндекс. Навигатор» порталы мәгълүматлары буенча, авария аркасында юлдагы өч полоса да ябылган.
Шаһитлар «Татар-информ» агентлыгына хәбәр иткәнчә, Казанга керү юлында гаять зур «бөке» барлыкка килгән. Залесная һәм Осиново урамнары чатыннан алып Юдино бистәсенә борыла торган урында ук машиналар туктап калган.
«Юдино бистәсенә борыла торган урыннан ук «бөке» башлана. Машиналары бөтенләй бармый диярлек. Ә сигезенче яртылар тирәсендә Мәскәү юнәлешендәге юл чишелешеннән үк «бөке» башланачак», - диде бер машина йөртүче агентлыкка.
Шәһәр Дәүләт автоинспекциясендә «Татар-информ» агентлыгына белдерүләренчә, биредә Honda, Suzuki һәм «Лада» автомобильләре бәрелешкән. Авариядә беркем дә зыян күрмәгән. Һәлакәт булган урында автоинспекторлар эшли.