Милли китапханәдә Финляндия татарлары турында «Тунган як» фильмының дәвамы күрсәтеләчәк
2016 елда дөнья күргән «Тунган як» фильмының дәвамы әзер. Авторлары – Ильяс Гафаров белән Рәдиф Кашапов «Тунган як: Суоми» фильмын 5 гыйнвар көнне 18.00 сәгатьтә Милли китапханәдә тамашачыга тәкъдим итәчәк.
«Әгәр беренче өлештә күптән түгел Европага күченгән эмигрантлар белән әңгәмәләр төшерелсә, икенче өлештә Ильяс Гафаров, Рәдиф Кашапов һәм Нуршат Әсхәдуллин йөз елдан артык элек Финляндияга күченгән, ләкин телләрен, диннәрен, гореф-гадәтләрен саклап калган татарларны өйрәнә», диелгән фильм турындагы хәбәрдә.
Фильм геройлары арасында - футболчы Атик Исмаил, музыкант Дәниз Бәдретдин, Финляндия Ислам җәмгыяте башлыгы Гөлтен Бәдретдин һәм башкалар бар.
Авторлар «Финляндия татарларының буыннар конфликтлары бармы?», «Катнаш никах проблемасын ничек чишәләр?», «Татарстанга, Финляндиягә нинди мөнәсәбәттә?», «Киләчәккә оптимизм белән карыйлармы?» кебек сорауларга җавап эзли.
Фильм русча субтитрлар белән күрсәтеләчәк. Фильмны карагач, Финляндиядә туып үскән татар музыканты Дәниз Бәдретдин белән фикер алышу мөмкинлеге булачак.
- Ильяс Гафаров - Yummy Music лейблына нигез салучы, Tat Cult Fest яңа татар мәнәнияте фестивале, Tat Cult Lab музыкаль лабораториясе продюсеры, Татарстан Республикасы Милли китапханәсендә концертлар һәм тамашалар оештыручы.
- Рәдиф Кашапов - Yummy Music лейблының креатив директоры, «Реальное время» интернет-гәзите баш мөхәррире урынбасары, Tat Cult Fest һәм Tat Cult Lab оештыручыларының берсе, Jadidfest һәм «Печән базары» фестивальләре кураторы, qaynar лабораториясе музыканты. «Ехали татары» веб-сериалы сценарий язучысы һәм «Шихаб хәзрәт» фильмының алып баручысы.