Рөстәм Миңнеханов пилотсыз «КАМАЗ»лар өчен М11 трассасының бер участогын ачуда катнашты
Татарстан Рәисе Рөстәм Миңнеханов Санкт-Петербургта пилотсыз «КАМАЗ» йөк машиналары йөрү өчен билгеләнгән М11 «Нева» трассасының бер участогын ачу тантанасында катнашты. Бу хакта «Татар-информ» агентлыгына республика җитәкчесенең матбугат хезмәтендә хәбәр иттеләр.
«Пилотсыз логистик коридорлар» проекты пилотсыз йөк автомобильләре базарын булдыру һәм анда чыгуга исәпләнгән. Бүген М11 «Нева» юлының 679нчы километрында «КАМАЗ» акционерлык җәмгыятендә җитештерелгән пилотсыз машиналарны җибәрделәр. Коммерция йөге төягән өч автомобиль Санкт-Петербург – Мәскәү – Санкт-Петербург маршруты буйлап юлга кузгалды.
Машиналар автоматлаштырылган йөртү системасы белән җиһазландырылган. Йөртүче-сынаучы транспорт чарасының эчендә утыра һәм автоматлаштырылган идарә итү режимын куллануны контрольдә тота. Үз чиратында, транспорт чарасыннан читтә диспетчер эшли – ул маршрутизацияне оештыра һәм автомобиль хәрәкәтен контрольдә тота.
Бүген Рөстәм Миңнеханов Петербург халыкара икътисади форумында катнашу өчен эш сәфәре белән Санкт-Петербургка килде. Форум кысаларында Татарстан делегациясе берничә очрашуда һәм килешүләргә кул куюда катнашачак.
Йөкләрне пилотсыз транспортировкалауны сынау эксперименталь хокукый режим программасы буенча оештырылуы хакында «Татар-информ» агентлыгы элегрәк хәбәр иткән иде. Әлегә «КАМАЗ» акционерлык җәмгыятендә җитештерелгән пилотсыз машиналар гына барлык критерийларга да җавап бирә.