Бөек Ватан сугышындагы батырлык өчен бирелгән орден 70 елдан соң табылган
Түбән Кама районының Келәтле авылы егете Михаил Золотовның Бөек Ватан сугышында күрсәткән батырлыгы өчен бирелгән «Кызыл Байрак» орденын якыннары 70 елдан соң эзләп тапкан. Бу хакта «Туганайлар» сайтында хәбәр ителә.
1908 елгы Михаил Золотов 33 яшендә Бөек Ватан сугышына китә. Хатыны Александра белән 3 баласы була – ике егет һәм бер кыз. Бүгенге көндә кызы Галина гына исән. Ул Түбән Кама районының Сарсаз-Бли авылында яши.
Әтисе сугышка киткәндә Галина әнисенең корсагында кала. Кызга әтисен күрү насыйп булмый. Михаил Золотов Советлар Союзының миллионлаган солдатлары кебек үк, сугыш кырында яраланып, госпитальдә үлә. «Әти кайта алмады. Әни көтте. Ул әтинең чынлап үлгәнен абый армиядән кайткач кына белде», – дип искә алды Галина Кузьмина.
Галина Кузьминаның йортында фронттан килгән хатлар гына түгел, сугышка кадәр колхозда мал врачы булып эшләгән әтисе Михаилның көндәлекләре, документлары һәм, хәтта, бер дару шешәсенә кадәр саклана.
Фото: © «Туганайлар»
Михаил Золотовның «Кызыл Байрак» ордены белән бүләкләнгәне алдан билгеле була. Әниләре Александра иренең бүләген алырга дип Ширәмәттәге хәрби комиссариатка бара. Әмма Александра Золотованы «үзе үлгәч, бирелми инде», дип кире борып кайтаралар. Михаил Золотовның үлгәнә 70 ел тулганда гына, Галинаның кызы Нина бабасының орденын эзләп таба.
Фото: © «Туганайлар»
2013 елның 21 февралендә Галина Кузьминага әтисенең бүләген тапшыралар. «20 февральдә миңа 70 яшь тулды. Әти миңа туган көнгә бүләк җибәргән кебек булды», – дип сөйләде Галина. Аларга орденның үзен түгел, аның муляжын һәм таныклыгын гына бирәләр. Россия Саклану министрлыгының 2008 елгы боерыгы буенча, Бөек Ватан сугышында һәлак булганнарның бүләге урынына, аларның туганнарына таныклык кына бирелергә тиеш.