Миңнеханов Татарстан белән Смоленск өлкәсе арасында товар әйләнешен арттырырга чакырды
ТР Рәисе матбугат хезмәте
Татарстанга һәм Смоленск өлкәсенә хезмәттәшлекнең яңа юлларын табу һәм товар әйләнешен арттыру мөһим. Бу хакта Татарстан Республикасы Рәисе Рөстәм Миңнеханов төбәк губернаторы вазифаларын вакытлыча башкаручы Василий Анохин белән очрашуда белдерде. Алар Петербург халыкара икътисади форумы кысаларында очрашты.
Бүгенге көндә төбәкләр арасында товар әйләнеше түбән дәрәҗәдә, бары тик бер миллиард сум тирәсе генә тәшкил итә, дип белдерде Татарстан Республикасы Рәисе.
«Хәзерге катлаулы шартларда үсеш юлларын табу мөһим, шул исәптән эчке базарда да. Безнең ведомстволар арасында тыгыз хезмәттәшлек урнаштырырга кирәк», – дип саный ул.
Хезмәттәшлекне үстерү өчен Татарстан Республикасы Рәисе уртак эшче төркем төзергә чакырды.
Очрашу ахырында Миңнеханов белән Анохин Татарстан белән Смоленск өлкәсе арасында хезмәттәшлек турында килешү имзалады, дип хәбәр итә Татарстан Республикасы Рәисенең матбугат хезмәте.