Рөстәм Миңнеханов яңа юл инфраструктурасын сыйфатлы элемтә белән тәэмин итәргә чакырды
Татарстанда юллар күп төзелә, әмма юл инфраструктурасын сыйфатлы элемтә белән тәэмин итү мәсьәләсе кала. Татарстан Республикасы Рәисе Рөстәм Миңнеханов «Мегафон» гавәми акционерлык җәмгыяте генераль директоры Хачатур Помбухчан белән очрашуда бу мәсьәләне хәл итәргә чакырды. Алар Петербург халыкара икътисади форумы кырында очрашты.
Юл төзелешендә масштаблы проектлар мисалында Миңнеханов Алексеевск–Әлмәт юлын атады.
«Сыйфатлы элемтә белән тәэмин итү проблемасы бар. Сезнең ярдәмегез белән бу мәсьәләне хәл итәргә һәм маршрут буенча торак пунктларны һәм юл инфраструктурасын сыйфатлы элемтә белән тәэмин итәргә өметләнәбез», – диде ул компания җитәкчесенә.
Хачатур Помбухчан үз чиратында Татарстан компанияләре белән хезмәттәшлекне киңәйтүгә кызыксыну белдерде һәм республикада гамәлгә ашырыла торган халыкара проектларда катнашырга әзер булуын әйтте, дип хәбәр итә Татарстан Республикасы Рәисенең матбугат хезмәте.