Рөстәм Миңнеханов Хәтер һәм кайгы көне темасына видео урнаштырды
Татарстан Рәисе Рөстәм Миңнеханов бүген, Хәтер һәм кайгы көнендә, Татарстанлыларга Бөек Ватан сугышы елларында совет гражданнарының батырлыгы турында искә төшерде. Телеграм-каналында ул республика яшьләре «В тот страшный день земля рвануло в небо» шигырен укулары сурәтләнгән видео урнаштырган. Бу шигырь һәлак булган геройлар истәлегенә багышлана.
Яшьләр видеороликта Мәңгелек ут, Җиңү паркында куелган Совет солдаты һәйкәле, Казан Кремле фонында дүрт юллыклар сөйли.
«1941 елның 22 июнендә иртә таңда Гитлер Советлар Союзына хыянәтчелек белән һөҗүм итте. Батырлык һәм ныклык күрсәтеп, миллионлаган совет гражданы үз гомерләре бәрабәренә Ватанны яклады. Без бу хәтерне саклыйбыз һәм кайгырабыз. Киләчәк буыннарга тормыш бүләк иткән каһарманнарга мәңгелек дан», – дип язган бу видео астына Миңнеханов.
Исегезгә төшерәбез, Казанда узган төндә истәлекле чаралар узды. Мәсәлән, 8 кеше «Хәтер шәме» акциясендә катнашты. Алар, кулларына лампалар тотып, Горький исемендәге парктан Җиңү паркына кадәр җәяү узды. Анда алар Әфганстандагы сугыш ветераннары белән бергә Мәңгелек утка чәчәкләр салды. Моннан тыш, иртәнге сәгать дүрттә Татарстан башкаласында «Казан – Хезмәт батырлыгы шәһәре» стеласыннан Урицкий исемендәге парктагы мемориалга кадәр матәм йөреше узды.