Айгөл Әхмәтшина «Ел җырчысы» номинациясендә Халыкара премия исемлегенә керде
Опера җырчысы Айгөл Әхмәтшина 2023 елгы Халыкара опера премиясенең «Ел җырчысы» категориясенә кандидатларның беренчел исемлегенә кергән. Бу категориядә шулай ук Италиядән сопрано тавыш иясе Элеонора Буратто, Латвия меццо-сопраносы Элина Гаранча, Албания сопраносы Эрмонела Яхо, Көньяк Африка сопраносы Голда Шульц һәм Америка сопраносы Коринн Уинтерс тәкъдим ителгән. Бу хакта «Башинформ» яза.
«Көн саен мине рухландырып торучы искиткеч хезмәттәшләрем арасында булу — минем өчен зур дәрәҗә! Барлык номинантларны да котлыйм! Минем искиткеч менеджерым Марчинга, ярдәмчем Камелиягә, гаиләмә һәм дусларыма, шулай ук бу юлда миңа ярдәм иткән һәркемгә зур рәхмәтемне белдерәсем килә. Сезнең ышануыгыз — минем өчен бик зур нәрсә. Бу гадәттән тыш хөрмәт өчен opera_awards ка рәхмәт. Мин бик рәхмәтле», — дип язган җырчы үзенең социаль челтәрләрдәге битендә.
2023 елгы Халыкара опера премиясе җиңүчеләре 9 ноябрьдә, Варшавадагы Польша милли операсының Вельки театрында игълан ителәчәк.
- Айгөл Әхмәтшина — колоратур меццо-сопрано тавыш иясе. Башкортстанның Миякә районы Кыргыз-Миякә авылында туган, Уфа сәнгать училищесын тәмамлаган.
- Халыкара конкурслар лауреаты, шул исәптән: Ганс Габор исемендәге «Бельведер» Халыкара опера җырчылары конкурсының I премиясе, New Opera World Халыкара опера бәйгесе лауреаты, Федор Шаляпин исемендәге Халыкара вокалистлар конкурсы дипломанты.
- Айгөл Әхмәтшинаның дөньякүләм опера карьерасы «Ковент-Гарден» Король опера театрының яшьләр программасына чакырылудан башлана. 2017 елда Айгөл Франциядә музыкаль фестивальдә Россининың «Золушка» операсында төп партиядә, 2018 елның декабрендә «Ковент-Гарден» Король театрында Бизеның «Кармен» операсында дебют белән чыгыш ясый. Шул вакыттан җырчының дөньякүләм карьерасы башлана.