Мөфти Равил Гайнетдинга Владимир Путинның Рәхмәт хаты тапшырылды
Кичә Мәскәү Хөкүмәте йортында башкала мэры Сергей Собянин Россия мөселманнары Диния нәзарәте рәисе, мөфти шәех Равил Гайнетдинга ислам динен кабул итүнең 1100 еллыгын бәйрәм итүгә зур өлеш керткәне өчен РФ Президенты Владимир Путинның Рәхмәт хатын тапшырды. Бу хакта Россия мөселманнары Диния нәзарәтенең матбугат хезмәте хәбәр итә.
«Идел буе Болгар дәүләтендә ислам динен кабул итүнең 1100 еллыгын бәйрәм итүгә әзерлек һәм аны үткәрүдәге хезмәтләре өчен», - диелә документта.
2022 елда Идел буе Болгар дәүләте халыклары тарафыннан ислам динен рәсми рәвештә кабул итүнең 1100 еллыгын бәйрәм итү Россия исламы тарихында һәм үсешендә мөһим этап булды, чөнки дәүләт башлыгы ярдәмендә исламның мондый юбилее тарихта беренче тапкыр федераль дәрәҗәдә билгеләп үтелде. РФ Президенты Владимир Путин тарафыннан хупланган әлеге инициатива белән Россия мөселманнары Диния нәзарәте рәисе, мөфти шәех Равил Гайнетдин чыкты.