Гамбия матбугаты илгә Рөстәм Миңнеханов килүен игълан итә
Гамбия Республикасы җирле матбугаты илгә Татарстан Рәисе Рөстәм Миңнеханов килүен игълан итә. Бу хакта «Татар-информ»га ТР Рәисенең матбугат хезмәте җитәкчесе Лилия Галимова хәбәр итте.
Фото: © ТР Рәисе матбугат хезмәте
Массакүләм мәгълүмат чарасында билгеләп үтелгәнчә, Татарстан Рәисе һәм «Россия — Ислам дөньясы» стратегик күзаллау төркеме рәисе Ислам хезмәттәшлеге оешмасына кергән илләрнең дәүләт һәм хөкүмәт башлыклары XV саммитында катнашу өчен Россия делегациясен җитәкли.
Рөстәм Миңнеханов Ислам хезмәттәшлеге оешмасы саммитында катнашу өчен эш визиты белән Гамбиягә килгән, дип «Татар-информ» хәбәр итте. Аның саммит кысаларында берничә очрашуы планлаштырылган. Моннан тыш, ТР Рәисе чараның төп сессияләрендә катнашачак.