Лавров һәм Ван И БРИКС саммитына Путин һәм Си Цзиньпин очрашуына әзерлек хакында сөйләште
РФ тышкы эшләр министры Сергей Лавров Кытай тышкы эшләр министры Ван И белән БРИКС саммитына һәм Россия Президенты Владимир Путинның Кытай Халык Республикасы лидеры Си Цзиньпин белән чираттагы очрашуына әзерлек хакында фикер алышты.
РФ Тышкы эшләр министрлыгы хәбәр иткәнчә, министрлар сәяси диалог үсешен, шулай ук халыкара вазгыятьнең югары турбулентлыгы чорында Россия һәм Кытай арасындагы гамәли бәйләнешне югары бәяләде. Яклар югары дәрәҗәдә ирешелгән килешүләргә, Казанда узачак саммитка әзерлек барышына һәм дус илләрнең Президентлары арасындагы яңа элемтәләргә аерым игътибар юнәлтте.
Лавров һәм Ван И шулай ук халыкара мәйданчыкларда Россия һәм Кытай арасындагы тышкы сәяси координацияне ныгытуның әһәмиятен билгеләп үтте.
- Искәртеп узабыз, БРИКС – 2006 елда нигез салынган халыкара берләшмә. Аның атамасы инглизчә BRICS сүзенә - Brazil (B), Russia (R), India (I), China (C), South Africa (S) – берләшмәнең беренче әгъзаларына барып тоташа. 2024 елның соңгы 9 аенда БРИКСка Берләшкән Гарәп Әмирлекләре, Мисыр, Согуд Гарәбстаны, Иран һәм Эфиопия кушылды. Шулай ук Төркия берләшмәгә керергә теләп заявка бирде.
2024 елның 22-24 октябрендә БРИКС илләре әгъзалары Татарстан башкаласында узачак саммитта очраша.