Казанда татар аш-суы рецептлары белән открыткалар җыентыгын тәкъдим иттеләр
Татарстан Республикасы Премьер-министры урынбасары Ләйлә Фазлыева «Сабантуй.Рецептлар» открыткалар җыентыгын тәкъдим итте. Презентация «Татар-информ»да узган матбугат конференциясендә узды.
«Бу басма безнең аш-суга карата кызыксыну зур булуны раслый. Татар аш-суы серенә барысы да төшенергә тели. Ул зур түгел, әмма үзенчәлекле. Ул туклыклы, ләкин без аның күбрәк булуын телибез. Татар ашлары серле, анда безнең халыкның күңеленең сере бар», - дип сөйләде журналистларга ТР вице-премьеры.
Әлеге открыткалар җыентыгы – узган елгы Сабантуйда ук башлап җибәрелгән эшнең нәтиҗәсе. Ул вакытта рецептлар җыю игълан ителде. Электрон һәм кәгазь формада 200гә якын гариза кабул ителде, шулар арасыннан 123 рецепт сайлап алынды. Нәтиҗәдә җыентыкка 54 рецепт керде: гөбәдия, ит бәлеше, ат итеннән колбаса, өлеш, өчпочмак һәм башка милли ризыкларның вариантлары. Җыентыкны республика Премьер-министры урынбасары төзеде.
«Ризыклар эчлеге ягыннан кабатланмый. [Ризыклар] үзенчәлеге, спецификасы, рецептураның тулылыгы ягыннан сайлап алынды. Аеруча үзенчәлеклеләре җыентыкка керде», - диде Фазлыева.
Рецептлар җыентыгы башта «люверсларга тегелгән китап» буларак уйланылган булган, әмма китапны әзерләү процессында идея открыткаларга кадәр гадиләштерелгән. Җыентык өчен иллюстрацияләр һәм фотографияләрне Н.Фешин исемендәге Казан сәнгать училищесы каршындагы Креатив индустрияләр мәктәбе студентлары әзерләгән. Фоторәсемнәр ясау өчен ризыкларны В.Тимирясов исемендәге Казан инновацион университеты студентлары пешергән.
Рус һәм татар телләрендәге басмадан тыш җыентык инглиз һәм гарәп телләрендә дә җитештерелгән. Ләйлә Фазлыева «Татар-информ» хәбәрчесе белән әңгәмә вакытында билгеләп үткәнчә, бу эштә узган БРИКС саммиты да мөһим роль уйнарга мөмкин. Татар китапларын гарәп телендә бастыруга трендны Сталик Ханкишиев та хуплый. Октябрьдә кулинар язучы үзенең «Татарларның җире, җаны һәм ризыгы» дип аталган яңа китабының гарәп телле тиражын әзерләвен телгә алды. Шулай да тәрҗемә итү идеясенең авторы бар.
«Бу идея катнашучыларның берсенеке. Ул Казанга гарәп һәм инглиз телләрендә сөйләшүче бик күп кунаклар килә, диде. Тәрҗемә итү зарурлыгы барлыкка килде», - дип сөйләде журналистларга Ләйлә Фазлыева.
«Сабантуй.Рецептлар» открыткалар җыентыгы Татарстан Хөкүмәте, ТР Мәдәният министрлыгы, ТР Рәисе каршындагы Мәдәниятне үстерү һәм яклау фонды һәм ТР мәдәният өлкәсенә инновацияләр кертү һәм традицияләрне саклау ресурс үзәге катнашында әзерләнде.