Зәйдә хәрби гаиләсендә яңа туган балага 100 мең сумлык сертификат тапшырылды
Мобилизация кысаларында Ватаныбыз сагына баскан Зәй хәрбие Хәмит һәм аның тормыш иптәше Анна гаиләсендә шатлыклы вакыйга — уллары туды. Бу хакта «Зәй яңалыклары» яза.
Бүген педагогик-психологик үзәктә гаиләне бала тууы белән район башлыгы Разиф Кәримов котлап, 100 мең сумлык сертификат тапшырды. Тантанада ялга кайткан хәрбиләр, район җитәкчелеге, волонтерлар катнашты.
«Сезне гаиләгездәге иң мөһим вакыйга - бала тууы белән котлыйм. Бәхетле бала булсын, сезгә ныклы сәламәтлек, иминлек, әтиегезнең исән-сау җиңү белән кайтуын телим», - диде чыгышында район башлыгы.
«Хабиб» кушаматлы хәрби мобилизация буенча Ватаныбыз сагына баскан. Ул алгы сызыкта илебез азатлыгы өчен көрәшә.
«Безнең улыбыз 4 майда туды. Аңа Руслан дип исем куштык. Баланы карарга миңа әнием ярдәм итә. Әлбәттә, әтиебезнең безнең янга тизрәк җиңү белән исән-сау әйләнеп кайтуын телибез», - ди яшь әни.