«Күрше Фест» конкурсында катнашуга 200дән артык гариза кабул ителгән

Татарстан рәисе Рөстәм Миңнехановның «Күрше Фест» фестиваль-конкурсының гаризалар кабул итү кампаниясе дәвам итә. Хәзерге вакытта 200дән артык гариза килгән. Бу хакта «Татар-информ»да узган матбугат конференциясендә «Безнең ишегалды» программасы кураторы Арина Петрова хәбәр итте.

«Хәзерге вакытта конкурс кампаниясе бара. 200дән артык гариза кабул ителде. Гомуми бюджет – 20 миллион сум. Әлеге акчалар җиңүчеләр арасында бүленәчәк. Конкурста физик затлар һәм үзмәшгульләр, ягъни күршеләре өчен бәйрәм оештырырга теләгән гади кешеләр катнаша ала», – дип аңлатты ул.

Гаризалар 15 июньгә кадәр кабул ителә, аннан соң алар экспертларга җибәреләчәк. Җиңүчеләр 1 июльдә игълан ителәчәк. 12 июльдән бәйрәмнәр башланачак.

«Барлык чараларны «Татарстанда җәй» программасы афишасында күрсәтәчәкбез, аларга теләге булган һәркем килә алачак», – дип ассызыклады Петрова.

Гаризаларны «Безнең ишегалды» программасы кысаларында төзекләндерелгән ишегалларына гына түгел, теләсә кайсы йортның йорт яны территориясенә бирергә мөмкин.

«Күрше Фест» ишегалды вакыйгалары проектын май башында Татарстан Рәисе Рөстәм Миңнеханов башлап җибәрде.

Конкурска йортта яшәүчеләр ишегалдында үткәрергә теләгән вакыйганы тәкъдим итәргә кирәк. Бу концерт, мастер-класс, күргәзмә, чәй эчү кичәсе, бакчачылар бәйрәме, йога дәресләре, шахмат турнирлары, арт-киңлекләр булдыру һәм башкалар булырга мөмкин.