Дәүләт хезмәтләре порталында 35 яңа «тормыш ситуациясе» барлыкка киләчәк
2025 елда Дәүләт хезмәтләре гражданнар һәм бизнес өчен федераль порталында 35 яңа «тормыш ситуациясе» барлыкка киләчәк. Бу хакта РФ вице-премьеры Дмитрий Григоренко аппаратында хәбәр иттеләр, дип яза РИА Новости.
«Тормыш ситуацияләре» өстенлекле сервислары дәүләт хезмәтләре күрсәтүнең сыйфатын арттыру мәсьәләләре буенча комиссия утырышында расланды», - дип аңлаттылар аппаратта.
Иң әһәмиятле «тормыш ситуацияләре» арасында – бала планлаштыру һәм табу, Россия гражданнарына чит илләрдә ярдәм күрсәтү һәм йорт хайваннары, аларның сәламәтлеге һәм ветеринария клиникалары турында мәгълүматны үз эченә алачак «Минем йорт хайваным» сервисы.
Моннан тыш, яңа сервислар ярдәмендә хәл итеп булачак бурычлар исемлегенә күчемсез милек сатып алу, опека рәсмиләштерү, судка электрон рәвештә документлар тапшыру һәм утырышларда веб-камера кулланып дистанцион катнашу, көллият һәм техникумга укырга керү, балалар өчен түгәрәкләр һәм секцияләргә язылу, балалар өчен ял һәм сәламәтләндерү оештыру, волонтерлык, социаль хезмәт күрсәтүне рәсмиләштерү, диспансеризация узу кертелгән.
Моннан тыш, «Дәүләт хезмәтләре» федераль порталында коралы һәм үзйөрешле техникасы булган гражданнар очраша алган ситуацияләрне хәл итү, онлайн режимда бизнес башлап җибәрү, IT-компания яки транспорт бизнесын ачу, салым тотып калу рәсмиләштерү, нотариуска мөрәҗәгать итү, юристтан бушлай ярдәм алу, шулай ук якын кешене югалту яки инвалидлык аркасында килеп чыккан проблемаларны хәл итү мөмкинлеге барлыкка киләчәк.
«Тормыш ситуацияләре» сервислары – дәүләт хезмәтләре күрсәтү эволюциясенең яңа этабы. <...> Хәзерге вакытта порталда 1,6 меңнән артык хезмәт һәм сервис бар. Аларны табу җиңелрәк булсын өчен, без әлеге хезмәт һәм сервисларны «тормыш ситуацияләре» принцибы нигезендә берләштерәбез – гражданнар проблемаларын бер урында комплекслы һәм тиз рәвештә хәл итә», – дип ассызыклады Григоренко.
«Тормыш ситуацияләре» 2023 елда барлыкка килде. Сервисларның һәркайсында уртача 17 хезмәт күрсәтелә. Барлыгы 35 сервис гамәлдә. Алга таба әлеге сервислар ярдәмендә хезмәт күрсәтү механизмын проактив итеп оештыру – хезмәтләрне гражданин мөрәҗәгать иткәнче үк тәкъдим итү планлаштырыла, дип өстәделәр РФ вице-премьеры аппаратында.