Рәшит Рәхимов Татарстан Рәисенә «Рубин»га ярдәм күрсәтүе өчен рәхмәт белдерде
«Рубин»ның баш тренеры Рәшит Рәхимов бүген Казан командасы белән Татарстан Республикасы Рәисенең очрашуында Рөстәм Миңнехановка һәм Марат Сафиуллинга (клубның президенты) ярдәм күрсәтүләре өчен рәхмәт белдерде.
«Рөстәм Нургалиевич, сез безгә кураторлык итә башлаганнан бирле һәм Марат Әдипович, сезнең ярдәмегез белән без алга адым ясадык. Ләкин безнең өчен бу аз, без туктап калырга тиеш түгел. Безгә көчле ярдәм күрсәтелә, барлык мөмкинлекләр дә бар. Шуңа күрә миннән башлап барлык башка хезмәткәрләргә кадәр һәркем планканы сакларга тиеш, без алга барырга тиеш. Мин монда килгәндә биредә битараф кеше булмаячак, дип вәгъдә иткән идем. Без үзебезне көчле иткән сыйфатларны сакларга тырышачакбыз. Сезнең һәрберегез алга адым ясады. Алда әле мондый адымнар күп булырга тиеш. Ләкин моның өчен үз-үзеңне фида кылып эшләргә – имгәнмәскә, әмма көрәшләрдә җиңүләр санын арттырырга кирәк. Алар һәр матч саен бик күп була, әмма барыбер арттырырга кирәк.
Рөстәм Нургалиевич, сез безгә ярдәм итәрсез, һәрвакыт команда белән булырсыз, дип ышанам. Моның өчен сезгә рәхмәт белдерәм. Бу безгә бик нык булыша. Без исә, үз чиратыбызда, нәтиҗәләрне яхшырту өчен мөмкин кадәр барысын да эшләячәкбез», – дип тапшыра Рәхимовның сүзләрен «Рубин» матбугат хезмәте.
Россия премьер-лигасының 2025/26 елгы сезоны бу ялларда башланып китә. Беренче турда «Рубин» читтә «Ахмат» командасы белән уйнаячак.