Татарстанлыларга дәвалану өчен 20 мең сумга якын акчаны ничек кайтарып булуын аңлаттылар
Түләүле медицина хезмәтләре күрсәтелгән татарстанлылар дәвалануга салым чигерүен рәсмиләштерә ала. Аны дару препаратлары сатып алганда һәм теләсә нинди медицина хезмәтләренә (шул исәптән стоматологияне дә кертеп) чыгым тотканда рәсмиләштерергә мөмкин. Салым чигерүен ничек алырга соң? Бу хакта тулырак - «Татар-информ» агентлыгы материалында.
Салымны түбәндәге кешеләрнең дәвалануына түләнгән очракта кире кайтарырга мөмкин:
- үзенеке, ата-ананыкы, иренеке яки хатыныныкы;
- уллыкка яки тәрбиягә алынган 18 яшькә кадәрге баланыкы. 2022 елдан башлап, әгәр бала көндезге бүлектә белем алса, 24 яшькә кадәр. Бу очракта чыгымнар ата-ана яки попечитель тарафыннан тотылырга тиеш. Әгәр дә дәвалану өчен бала үзе түләгән булса, салым чигерүенә хокук аның тарафыннан мөстәкыйль рәвештә гамәлгә ашырыла — 13 процентлы ставка буенча физик затлар кеременә салымга салына торган үз керемнәре хисабына.
Дәваланган өчен салым чигерүен алу ысуллары
- 3-НДФЛ декларациясен тапшырганда календарь ел тәмамлангач.
- ел дәвамында эш бирүче аша – бу очракта Федераль салым хезмәте сайтындагы шәхси кабинетта гариза калдыру таләп ителә.
- 2025 елдан Федераль салым хезмәтендәге шәхси кабинет аша салым чигерүен гадиләштерелгән форматта рәсмиләштерү мөмкинлеге барлыкка килде (2024 елның 1 гыйнварыннан башлап тотылган чыгымнар өчен).
Нинди сумма алу мөмкинлеге бар
Дәвалану чыгымнарын кайтару өчен исәпкә алына торган чыгымнарның гомуми күләме елына 150 мең сум тәшкил итә. Димәк, татарстанлылар бу сумманың 13 процентын (күп дигәндә 19,5 мең сум) кире кайтарырга мөмкин.
Дәвалану кыйммәткә төшкән очракта лимит кулланылмый: хезмәтләр расланган исемлеккә кертелсә, түләнгән барлык сумманың 13 проценты кире кайтарылырга тиеш.
Салым чигерүен файдалану хокукы 3 ел дәвамында саклана, әмма аның калган өлеше киләсе чорларга күчерелми.