2026 ел Түбән Камада Беренче төзүчеләр елы дип игълан ителде
Түбән Кама районы башлыгы, Түбән Кама мэры Радмир Беляев 2026 елны шәһәрдә Беренче төзүчеләр елы дип игълан итте. Бу хакта ул үзенең Telegram-каналында хәбәр итте.
Карар Түбән Каманың 60 еллыгын әзерләү һәм бәйрәм итү буенча оештыру комитетының быелгы беренче утырышында кабул ителде.
Радмир Беляев сүзләренчә, юбилей елы берьюлы өч төп векторны берләштерәчәк: шәһәргә нигез салынуга 60 ел тулу, Россия халыкларының бердәмлеге елы һәм Татарстан Республикасының Хәрби һәм хезмәт батырлыгы елы. «Алар барысы да юбилей елының төп идеясен ассызыклый – хезмәткә, тарихка һәм Түбән Каманы булдырган һәм үстерүне дәвам иткән кешеләргә хөрмәт», - дип билгеләде мэр.
Район башлыгы юбилей бәйрәм чаралары белән генә чикләнмәячәк дип белдерде. Ел дәвамында шәһәрдә ай саен зур вакыйгалар уздыру, шулай ук комплекслы үсеш программасын гамәлгә ашыру планлаштырыла.
Планлаштырылган шәһәр проектлары арасында – Илдус Садыйков исемендәге Беренчеләр йортын һәм яңартылган автовокзалны ачу. Моннан тыш, оештыру комитеты утырышында документаль фильм төшерү, Түбән Кама турында китаплар чыгару, истәлекле кубоклар һәм тәңкәләр чыгару турында фикер алыштылар.
Радмир Беляев шәһәр халкын үз инициативалары белән актив уртаклашырга чакырды. Аның сүзләренчә, юбилей елы бәйрәм итү өчен генә сәбәп түгел, ә тарихи хәтерне саклауда һәм яңа шәһәр традицияләрен формалаштыруда мөһим этап булачак.