Татарстанда «Дала Евразиясе халыкларының тарихы һәм мәдәнияте» төбәк программасы расланды
Татарстан Республикасында «Дала Евразиясе халыкларының тарихы һәм мәдәнияте» төбәк программасы расланды. ТР Министрлар Кабинетының шул хактагы карары ТР хокукый мәгълүмат порталында урнаштырылган.
2026-2034 елларга исәпләнгән программа Үзәк Азия һәм Көнчыгыш Европа илләре экспертлары катнашында масштаблы дисциплинаара фәнни проекттан гыйбарәт. Ул Россия фәненең әһәмиятен киңәйтү, мәдәниятара диалогны ныгыту, дөрес тарихи белемнәр булдыру һәм үткәнне фальсификацияләүгә каршы торуга юнәлдерелгән.
Документта билгеләп үтелгәнчә, Дала Евразиясе халыкларының тарихи-мәдәни мирасы Россия цивилизациясенең һәм Евразия континенты тарихи-мәдәни ландшафтының мөһим нигезе булып тора. Программаны гамәлгә ашыру төбәк халыклары үсеш динамикасын, дәүләтчелек барлыкка килүне, күчмә һәм утрак мәдәниятләрнең үзара бәйләнешен, шулай ук сәүдә магистральләрен үстерүне һәм шәһәр мәдәниятен формалаштыруны өйрәнүгә бердәм методологик алымнар булдыруны тәэмин итәргә тиеш.
Тарихи-мәдәни тикшеренүләр, археологик экспедицияләр һәм архив эзләнүләре, фәнни һәм популяр әдәбият бастыру, мәдәниятара диалогны үстерү, халыкара форумнар һәм конференцияләр уздыру, материалларны цифрлаштыру һәм халыкара хезмәттәшлекне киңәйтү эшнең төп юнәлешләре булачак.
Программаның бурычлары арасында тарихи-мәдәни мирасның бердәм цифрлы киңлеген булдыру, Дала Евразиясе мәдәниятләрен үстерүнең фәнни моделен формалаштыру, фәнне популярлаштыру һәм тарихи хәтерне ныгытуны атап үтәргә мөмкин. Шулай ук фәнни һәм фәнни-популяр басмалар, видеоматериаллар әзерләү һәм бастырып чыгару, шулай ук Евразия илләре һәм дөньяның башка төбәкләре галимнәре катнашында чаралар үткәрү күздә тотыла.