Мәдәният министрлыгы коллегиясендә Җәлил турында күчмә күргәзмә проекты тәкъдим ителде
Кичә ТР Мәдәният министрлыгы коллегиясендә беренче тапкыр «Муса Җәлил: батырлыкка күтәрелү» күргәзмәсен тәкъдим иттеләр. Ул Татарстан Республикасы Милли музее тарафыннан булдырылган һәм татар шагыйре, Советлар Союзы Герое, Ленин премиясе лауреаты Муса Җәлилнең тууына 120 ел тулуга багышланган.
Бу – өч куб, аларда Татарстан Милли музее тупланмасыннан фотосурәтләр һәм документлар урнаштырылган, аның шигырьләреннән өзекләр өстәлгән. Кубларда чорның типик предметларын күрсәтү өчен подиумнар бар һәм биография фактлары һәм шагыйрь белән бәйле объектлар турында видеороликлар белән җиде QR-код урнаштырылган.
Күргәзмә проекты шагыйрьнең балачагы һәм яшүсмерлеге, уку еллары, Җәлилнең Казанда һәм Мәскәүдә иҗади һәм иҗтимагый эшчәнлеге, шулай ук Кызыл Армия сафларында хезмәт итүе, әсирлеккә алынуы һәм «Отвага» газетасында хәрби хәбәрче булып эшләве турындагы бүлекләрне үз эченә алачак.
Милли музейның генераль директоры Айрат Фәйзрахманов проектның быел озын юл үтәчәге турында сөйләде.
«13 февральдән безнең проект белән КФУның Филология һәм мәдәниятара багланышлар институты студентлары танышачак. 26, 27 февраль көннәрендә анда «Җәлил укулары» дигән уртак фәнни конференция узачак. Соңыннан күргәзмә Минзәләгә юнәлә, Җәлил анда 1941 елда хәрби политруклар курсын тәмамлый. Аннан соң – Кайбыч районы. Күргәзмәне Оренбургка илтеп җиткерү һәм Мәскәүдә күрсәтү планында», - дип билгеләде ул.