«Син уенда» Бөтенроссия спорт проектлары бәйгесенең VI сезоны башланды
Гыйнвар ахырында «Син уенда» Бөтенроссия спорт проектлары конкурсының VI сезоны башланды.
Россия Хөкүмәте Рәисе урынбасары Дмитрий Чернышенко билгеләп үткәнчә, Россия Президенты 2030 елга физик культура һәм спорт белән даими шөгыльләнүче гражданнарның өлешен 70 процентка җиткерү бурычын куйган. Аның сүзләренчә, «Син уенда» бәйгесе бу максатка ирешүгә өлеш кертә һәм һәр сезон саен колачы киңәя.
Ул билгеләп үткәнчә, биш сезон эчендә конкурска илнең барлык төбәкләреннән 21 меңнән артык гариза килгән, катнашучылар арасында адаптив һәм фиджитал-спортны үстерә, шулай ук традицион төрләрне яңарта торган проектлар бар. Чернышенко перспектив спорт инициативалары авторларын алтынчы сезонга кушылырга һәм аларны гамәлгә ашыру өчен өстәмә ярдәм алырга чакырды.
Бәйгенең төп бурычы -россиялеләрне спорт белән шөгыльләнүгә җәлеп итә торган проектларны табу һәм аларга ярдәм күрсәтү. «Син уенда» конкурсы ел саен спорт министрлыгы ярдәмендә «Россия спорты» дәүләт программасы кысаларында үткәрелә.
Россия спорт министры Михаил Дегтярев хәбәр иткәнчә, алтынчы сезонда приз фонды шактый саллы: номинацияләрдә җиңүчеләр - 500әр мең, ә гран-при иясе 1 миллион сум алачак. Ул билгеләп үткәнчә, финанс ярдәменнән тыш, катнашучыларга белем бирү акселераторы, тармак экспертлары ярдәме, проектларны эшләп бетерү һәм партнерлар җәлеп итү буенча консультацияләр дә каралган.
«Син уенда» конкурсының VI сезонында катнашырга теләүчеләрдән гаризалар 31 мартка кадәр кабул ителә. Җиңүчеләрне бүләкләү 2026 елның җәенә планлаштырылган һәм Мәскәүдә узачак.