Казанда «Россиянең чаңгы юллары» ярышларында 20 меңнән артык кеше катнашты
Татарстан башкаласында «Россиянең чаңгы юллары» 44нче Бөтенроссия массакүләм чаңгы ярышлары тәмамланды.
Массакүләм узышлар Казанның дүрт мәйданчыгында оештырылды. «Локомотив» стадионы (Юдино бистәсе) төп трасса булды. Массакүләм стартлар шулай ук Горки-Әмәт урманында, «Дәрвишләр» торак комплексы Каенлыгында һәм Казансу елгасы тугаенда (Гаврилов – Чуйков урамнары чатында) оештырылды.
Казанда узган ярышларда барлыгы 20 500 кеше катнашты. Шуларның 6 170е - мәгариф учреждениеләреннән.
«Россиянең чаңгы юллары» кысаларында җитәкчеләр, спорт ветераннары, махсус хәрби операциядә катнашучылар арасында узышлар һәм хәйрия стартлары, шулай ук Татарстан Республикасы «Динамо» физкультура-спорт җәмгыяте оешуга 100 ел тулуга багышланган тематик узышлар һәм гаилә ярышлары оештырылды.