Казанда Фатих Әмирханның рухи мирасына багышланган әдәби кичә оештырылды

Кичә Роберт Миңнуллин исемендәге Республика балалар китапханәсендә татар әдәбияты классигы, күренекле прозаик, драматург, публицист, тәнкыйтьче һәм җәмәгать эшлеклесе Фатих Әмирханның 140 еллыгына багышланган «Фатих Әмирханның рухи мирасы» исемле әдәби кичә үткәрелде.

«Фатих Әмирхан – XX гасыр башында татар әдәбиятында тирән эз калдырган, татар журналистикасы формалашуына һәм үсешенә зур йогынты ясаган кешеләрнең берсе. Габдулла Тукай белән Фатих Әмирханның дуслыгы «Әл-ислах», «Ялт-Йолт», «Кояш», «Йолдыз» газета-журналларындагы хезмәттәшлек белән ныгытыла», – диде «Татар-информ»га китапханәнең Милли әдәбият һәм туган якны өйрәнү бүлеге мөдире, филология фәннәре кандидаты Нуридә Насыйбуллина.

Габдулла Тукай белән Фатих Әмирханның дуслыгы турында Татарстан Республикасы Фәннәр академиясенең Галимҗан Ибраһимов исемендәге Тел, әдәбият һәм сәнгать институты галимнәре – текстология бүлеге мөдире, филология фәннәре кандидаты Гөлназ Хөснетдинова сөйләгән. Өлкән фәнни хезмәткәр, филология фәннәре кандидаты Гөлнара Зәйниева язучының тормышы һәм иҗатыннан истәлекле фактлар китергән һәм мәктәп укучыларының сорауларына җавап биргән.

Нуридә Насыйбуллина әйтүенчә, әдәби чарада Фатих Әмирханның тормышы һәм күпкырлы иҗаты яктыртылган, аның шәхес һәм талантлы язучы буларак бай иҗади мирасы төрле яктан ачылган.

«Казанның Киров районындагы 152 нче гимназиянең 8,9 сыйныф укучылары Фатих Әмирханның биографиясе һәм әдәби мирасы турында күп кызыклы мәгълүмат тупладылар һәм академик басма белән таныштылар. Алты томлык әсәрләр җыентыгы – Фатих Әмирханның бәяләп бетергесез зур мирасы. Киләчәктә дә ул мирас халык күңелендә сакланыр, әсәрләре яшь буынны тәрбияләүдә чыганак булып калыр дип өметләнәбез», – диде китапханәнең Милли әдәбият һәм туган якны өйрәнү бүлеге мөдире.