Габдулла Тукайның тууына 140 ел тулу уңаеннан «Тукайны бергәләп укыйбыз» проекты уза
Татарстан Республикасында бөек татар шагыйре Габдулла Тукайның тууына 140 ел тулуга багышланган «Тукайны бергәләп укыйбыз. Читаем Тукая вместе» масштаблы проекты гамәлгә ашырыла. Бу хакта ТР Мәдәният министрлыгы матбугат хезмәте хәбәр итә.
Юбилей елы дәвамында Татарстан Республикасының 1,5 мең китапханәсендә пәнҗешәмбе көннәрендә ачык очрашулар уза, анда теләгән һәркем Габдулла Тукайның шигъри мирасы белән таныша ала. Шагыйрьнең әсәрләрен татар һәм рус телләрендә укыйлар һәм фикер алышалар.
Проектта офлайн һәм онлайн рәвештә катнашырга мөмкин:
1. Офлайн: пәнҗешәмбе көнне үзегез яшәгән торак пунктның теләсә кайсы китапханәсенә килергә. Катнашу бушлай.
2. Онлайн: #ТукайныБергәләпУкыйбыз #ЧитаемТукаяВместе хештеглары белән язма урнаштырып, социаль челтәрләрдә акциягә теләктәшлек күрсәтергә.
«Март аенда «Тукайны бергә укыйбыз» масштаблы акциясендә катнашучылар Габдулла Тукайның «Бәйрәм буген» һәм «Кошларга» шигырьләрен укый. Апрельдә проектта катнашучыларга «Милли моңнар», «Шагыйрь», «Туган җиремә», «И каләм!», «Яз галәмәтләре» шигырьләрен укырга тәкъдим ителә. Теләгән һәркемне акциядә катнашырга чакырабыз. Әсәрләрне татар телендә дә, рус телендә дә укырга мөмкин», - дип билгеләп үтте Татарстан Республикасы мәдәният министры урынбасары Дамир Натфуллин.