Миңнеханов Кытайга эш сәфәрендә Maextro автомобильләрен җитештерү объектында булды
Татарстан Рәисе Рөстәм Миңнеханов Кытайга эш сәфәре кысаларында JAC компаниясенең Maextro автомобильләрен җитештерү объектында булды. Бу хакта ТР Рәисе матбугат хезмәте җитәкчесе Лилия Галимова хәбәр итә.
JAC Motors Кытайның иң эре автоҗитештерүчеләре унлыгына керә. Компания җиңел, урта тоннажлы һәм авыр йөк машиналары, минивэннар, җиңел автомобильләр, электромобильләр, автобуслар, махсус шассилар, йөк төягечләр һәм башка төр техника, шулай ук автомобильләр өчен тапшыру тартмалары, двигательләр, автоагрегатлар һәм башкаларны җитештерә.
Фото: © ТР Рәисе матбугат хезмәте
Рөстәм Миңнеханов холдинг предприятиеләрендә инде берничә мәртәбә булган, бүген аңа яңа продукт – Maextro S800 күрсәттеләр, ул тулысынча электр һәм гибрид версияләенрдә җитештерелә.
Җитештерүче автомобильне премиаль сегмент буларак таныта. Дизайнерлык чишелешләреннән тыш, акыллы технологияләр комплексы кертелгән. Бу ишарәләр һәм тавыш командалары белән тулы масштаблы идарә итү.
Фото: © ТР Рәисе матбугат хезмәте
Конфиденциальлекне саклауның интеллектуаль системасы машинада берничә пассажир булган очракта машина йөртүченең шалтыратулары/навигациясе турындагы төп мәгълүматны автомат рәвештә яшерергә мөмкинлек бирә. Шулай ук юлларда көтелмәгән хәлләр очрагында куркынычсызлыкны тәэмин итү өчен күп кенә опцияләр тәкъдим итә.
Рөстәм Миңнехановка әйтүләренчә, Maextro S800 машиналарын 1,5 мең робот җитештерә, сыйфатны контрольдә тоту өчен 80нән артык участокта ясалма интеллект кулланыла. Фабрика 540 мең квадрат метр мәйданны били. Планлаштырыла торган максатчан еллык куәте – елына 200 мең автомобиль.
Республика Рәисе автомобильне сынап карады. Моннан тыш, республика җитәкчесе JAC компаниясенең фәнни-тикшеренү үзәгендә булды, анда яңа автомобильләр тәкъдим ителде.
Рөстәм Миңнехановка автомобильләрнең төп характеристикалары һәм продукцияне проектлау һәм җитештерүдә нинди технологияләр кулланылуы турында сөйләделәр.