Татарстан Премьер-министры: Айрат Фәррахов - лаеклы җитәкче
Казан дәүләт медицина университетында ректор вазифаларын башкаручы Айрат Фәрраховны рәсми рәвештә тәкъдим итү тантанасы булды. Тантанада Россия сәламәтлек саклау министры Михаил Мурашко һәм Татарстан Премьер-министры Алексей Песошин чыгыш ясады.
«Казан медицина университеты хаклы рәвештә илдә иң ихтирамга лаеклы уку йортларының берсе санала - ул ике гасырлык тарихы булган абруйлы югары уку йорты», - дип искәртте Михаил Мурашко.
Ул тәрбия эшенең медицина югары уку йортының төп бурычларыннан берсе булуын искәртте. Яшь кадрларны ватанпәрвәрләр һәм илебез гражданнары, авыр минутларда кешеләргә ярдәмгә килергә әзер торган белгечләр буларак үстерергә кирәк, дип белдерде министр. Бу соңгы алты елда илебез пандемия, махсус хәрби операция, техноген һәлакәтләр кебек сынаулар аша узганда аеруча актуаль.
Мурашко университет яңа җитәкче белән ирешелгән позицияләрен саклап калачагына ышана. Ул беренче чиратта үтәргә тиешле төп бурычларны (илкүләм проектларда катнашу, фәнни-тикшеренү лидерлыгын көчәйтү һәм гамәли сәламәтлек саклауга интеграция) билгеләде.
«Айрат Фәррахов - тәҗрибәле җитәкче, төбәкне, идарә итү системасын яхшы белә. Ул тармак алдында торган бурычларны тирәнтен аңлый торган кеше. Югары уку йортының зур ыргылыш ясау өчен мөмкинлеге бар. Сезгә уңышлар теләп калам», - дип сүзен төгәлләде РФ сәламәтлек саклау министры.
Алексей Песошин билгеләп үткәнчә, Казан медицина мәктәбе Татарстан Республикасыннан читтә дә киң танылган. Дистә еллар дәвамында ул бөтен ил өчен кадрлар әзерләүгә бәяләп бетергесез өлеш кертә. Ул искәрткәнчә, КДМУ ел саен 800 белгеч әзерләп чыгара.
«Айрат Зәкиевич - лаеклы җитәкче. Аның бөтен һөнәри юлы Татарстан Республикасының Сәламәтлек саклау системасы белән бәйле. Медицинаның төбәк һәм гомумдәүләт бурычларын тирәнтен аңлау КДМУның яңа казанышлары өчен ныклы нигез булыр дип ышанам», – диде Песошин.
Айрат Фәррахов коллегаларына, Дәүләт Думасы депутатларына, шулай ук сайлаучыларына рәхмәт белдерде. Ул татарстанлыларның мәнфәгатьләрен нәтиҗәле яклау өчен ун ел дәвамында бөтен көчен куюын билгеләп үтте.