АҚШ президенти Дональд Трамп журналистнинг йўқолиши ортидан Давлат котиби Майк Помпеони Саудияга жўнатди
АҚШ президенти Дональд Трамп журналист Жамол Хашоггининг йўқолиши масаласида 15 октябрда Саудия Арабистони қироли билан телефон орқали суҳбатлашганини маълум қилди.
-Мен ҳозиргина Саудия Арабистони қироли билан гаплашдим. У Саудия Арабистони фуқаросининг тақдири тўғрисида қандайдир маълумотларга эга эканини инкор қилди. Мен Давлат котиби Майк Помпеодан зудликда самолётга ўтириб, Саудия Арабистонига боришни илтимос қилдим. У керак бўлса бошқа жойларга, масалан, Туркияга ҳам боради. Қирол менга бу масалада Саудия Арабистони Туркия билан тиғиз ҳамкорликда иш олиб бораётганини айтди,-деди Дональд Трамп.
Аввалроқ АҚШ президенти Дональд Трамп Саудия Арабистони журналистнинг йўқолиб қолишига алоқадор экани аниқланса, Қироллик “жиддий жазоланиши”ни айтган эди.
14 октябрда Саудия АҚШ томонидан бўладиган иқтисодий ёки сиёсий таҳдидга тоқат қилмаслигини ва ҳар қандай санкцияга каттароқ санкция билан жавоб қайтаришини билдирган.
Саудия қиролининг танқидчиси бўлган Хашогги 2 октябрда Саудия Арабистонининг Истанбулдаги консулхонасига ҳужжат топширишга келган вақтда йўқолиб қолган.
Туркия расмийлари Хашогги консулхонада ўлдирилган бўлиши мумкинлигини тахмин қилган эди. Бироқ Саудия қироллиги бу таҳминларни инкор этиб, журналист консулхонадан тирик чиқиб кетганини билдирмоқда.
Жамол Хашогги Al Arab News телеканали директоридир. У кўплаб араб ва ғарб нашрлари, жумладан, Washington Post газетаси билан ҳамкорлик қилган.