Ўзбекистонлик велоспортчи аёл биринчи олтин медални қўлга киритди

Ўзбекистон номидан иштирок этаётган россиялик велопойгачи Ольга Забелинская республика учун биринчи олтин медални қўлга киритди, деб хабар беради Ўзбекистон Олимпия қўмитаси. Францияда профессионал велоспортчилар ўртасида «Chrono des Nations» халқаро турнири бўлиб ўтмоқда. Мусобақада Ўзбекистон терма жамоаси аъзоси Ольга Забелинская ҳам иштирок этди. Қувонарлиси, 26,5 километр масофага ўтказилган пойгада Забелинская барча рақибларини ортда қолдирди ва биринчи бўлиб маррага етиб борди. У 35 дақиқа 54 сония (ўртача тезлик 45 км/соат) натижа билан олтин медалга эга чиқди. Ундан кейинги ўринни 12 сония кеч маррага кириб борган даниялик Эмма Йоргенсен эгаллади. Кучли учликка пешқадамдан 35 сония кеч қолган мезбон спортчи Оудри Кордон-Рагот якун ясади. Забелинская Chronos des Nationsда тўртинчи бор иштирок этиши ва илк бор мусобақада ғолиб бўлди. Эслатиб ўтамиз, ушбу турнирнинг аввалги тўртта мусобақасида асли ўзбекистонлик, ҳозирда Россия фуқаролигини олган спортчи Зулфия Забирова (1997, 1998, 1999, 2002 годы) ғолиб бўлган. 38 ёшли Забелинская шу йили Ўзбекистон фуқаролигини олди. У бу қарорини «Россия 2020 йилги Олимпияда қатнашишини кафолатлай олмаслиги» билан изоҳлаган. Россия велоспортчилар федерацияси Забелинскаянинг жамоадан кетишини салбий қабул қилди, жумладан федерация президенти Вячаслав Екимов мусобақаларда спортчининг бошқа мамлакат байроғи остида иштирок этишини хоҳламаслигини айтган. Лекин Екимов UCI қоидаларига кўра, бунинг учун Федерация розилиги талаб қилинмаслигини таъкидлаган. Фуқаролик ўзгартириш билан боғлиқ карантинга кўра, Забелинская иккита дунё чемпионатини ўтказиб юбориши мумкин ва 2020 йилги Олимпия ўйинларида иштирок этиши номаълум бўлиб қолмоқда. Шу йили август ойида Забелинская Ўзбекистон терма жамоаси таркибида Осиё ўйинларида иштирок этиш учун ариза берди, лекин Николай Курков бошқараётган Вьетнам терма жамоаси норозилиги туфайли спортчи рўйхатга киритилмади. Ольга Забелинская – Ленинградда туғилган. У 2012 йилги Олимпия ўйинларида иккита бронза, 2016 йилги Олимпиадада эса кумуш медалини қўлга киритган. У Россиядаги Cogeas–Mettler Pro Cycling Team жамоаси номидан мусобақаларда иштирок этган. Спортчи аёл «Ватан учун хизматлари» медали соҳибаси, шунингдек, Россияда хизмат кўрсатган спорт устаси ҳисобланади. У 2011 йилдан бери Кипрда доимий аснода истиқомат қилади. Заболинская туғма юрак ҳасталигига эга, 2014 йили спортчи қонида допинг борлиги аниқланган ва унинг 1,5 йил мусобақалардан четланишига тўғри келган. Chrono des Nations – ҳар йили Вандей департаментида бошланиб, Францияда якун топадиган велопойга ўйини ҳисобланади. Мусобақалар 1982 йилдан бери ўтказилади, 1987 йилдан бошлаб эса унда аёллар иштирок этиб келмоқда. “Фарғона” халқаро ахборот агентлиги