ХОҲ ИШОНИНГ, ХОҲ ИШОНМАНГ…
ШПАРГАЛКА ҲАҚИДА ҚИЗИҚАРЛИ ФАКТЛАР
1. Шпаргалкадан ҳатто VIII- IX асрларда франклар ҳукмдори ҳисобланган Буюк Карл ҳам унумли фойдаланган. У ёзишни ҳам, ўқишни ҳам билмасди. Қўл остидагилар муҳим ҳужжатларга имзо қўйиши учун махсус имзо турини яратишган. Карл ҳужжатга қўл қўйиш керак бўлганда, қоғозга туширилган ўз имзосини кўчириб олган.
2. Гайдайнинг «Операция Ы» комедиясида абитуриент Дубнинг радиоалоқани шпаргалка ўрнида ишлатишга уриниб кўрганини ҳамма билади. Аммо Дуб уддасидан чиқа олмади. Имтиҳон олувчи сезиб қолди. Қарангки, шундай воқеа ҳаётда ҳам содир бўларкан. Масалан, бир куни ҳайдовчилик гувоҳномаси олиш учун имтиҳон топширишга келган исроиллик 19 яшар йигит ўзи билан видеокамера, наушниклар ва радиоузаткични шпаргалка сифатида имтиҳон хонасига олиб кирди. Унга ёрдам бериш учун келган дўсти эса ўша бино бурчагида алоқа ўрнатилишини интиқ кутарди. Афсуски, айёрлик ўхшамади. Имтиҳон олувчилар сезиб қолиб, шпаргалка устасини полиция ихтиёрига топшириб юборишди.
3. Эйнштейн ҳам мактабда ёмон ўқиган. Буни ҳамма билади. Лекин машҳур физикка айлангандан кейин ҳам кўпайтириш жадвалидан шпаргалка ўрнида фойдаланган. Ундан сабабини сўрашганда, «Ҳамма нарсани каллада асраш шартми? Ана, шпаргалка бор-ку!», деб жавоб берган.
4. Инглизлар 2018 йили футбол бўйича ўтган жаҳон чемпионатида Колумбия термаси устидан шпаргалка ёрдамида ғалаба қозонишган экан. Гап шундаки, матчдан кейин пенальтилар сериясига ўрин берилгач, Англия термаси дарвозабони Жордан Пикфордга шпаргалка келтириб беришган. Унда рақиб жамоа ўйинчиси тўпни асосан дарвозанинг қай бурчагига кўпроқ йўллаши ёзилган экан. Шпаргалка иш берди. Англия термаси Колумбия термаси устидан ғалаба қозонди.
Олимжон ҲАЙИТ тайёрлади