Ўзбекистон Хитойга ерёнғоқ экспортини йўлга қўяди
???? Каналга қўшилинг! ????
https://t.me/joinchat/AAAAADwt0NGCRoONT4f1_Q
Ўзбекистон Хитойга ерёнғоқ экспорт қилиш бўйича келишувга эришди. Келишув Хитойнинг Шанхай шаҳрида ўтказилаётган Халқаро импорт маҳсулотлари кўргазмасида имзоланди. Бу ҳақда «Ўздавкарантин» инспекцияси ахборот хизмати хабар берди. Мазкур кўргазмада Ўзбекистон Республикаси Бош вазири ўринбосари Элёр Ғаниев бошчилигидаги делегация иштирок этмоқда. Ушбу кўргазма доирасида ўтказилган музокаралар натижасида жорий йилнинг 5 ноябрь куни Ўзбекистон ва Хитой карантин хизматлари ўртасида Хитойга ерёнғоқ экспорт қилишга доир келишув имзоланди. Мазкур келишувда ерёнғоқни экспорт қилувчи тадбиркорлар учун қуйидаги асосий талаблар белгиланган: - ерёнғоқ етиштириладиган далалар, уни қадоқлаш цехлари, сақлаш омборхоналари Хитой ва Ўзбекистон карантин хизматларининг биргаликдаги рўйхатидан ўтказилиши; - ерёнғоқ нўхат донхўри, омборхона зарарли куяси, тегирмон парвонаси, омборхона узунбуруни, барг канаси, қора моғор касаллиги каби зараркунандалардан ҳоли бўлиши; - маҳсулот тупроқдан ҳоли ҳамда бегона ўт, уруғлар, ўсимлик қолдиқлари ва қум ёки шағал билан аралаштирилмаган бўлиши; - ерёнғоқ етиштириладиган дала Ўзбекистоннинг ўсимликлар карантини инспекторининг доимий назоратида бўлиши, маҳсулотни қайта ишлаш, қадоқлаш, сақлаш ва ташиш инспектор назорати остида амалга оширилиши; - маҳсулот қадоғи тоза, гигиеник, ҳаво ўтказадиган ва янги материаллардан иборат бўлиши; - ҳар бир қадоқда аниқ қилиб, хитой ёки инглиз тилида «This consignment is exported to the People’s Republic of China» деб ёзилиб, маҳсулот номи, уни етиштирган, ишлаб чиқарган, қайта ишлаган ва сақлаган корхонанинг номи ва рўйхатга олиш рақами каби маълумотлар кўрсатилиш. Белгиланган талабларга риоя этилмаган ҳолда, экспортга йўналтирилган маҳсулотлар чегара пунктларидан қайтарилиши мумкин. Талабларга жавоб берувчи дала, қадоқлаш цехлари ва сақлаш омборлари эгалари экспортчилар рўйхатидан жой олиш учун Вазирлар Маҳкамаси ҳузуридаги Ўсимликлар карантини давлат инспекциясига мурожаат қилиши мумкин. Жорий йилнинг 1—2 ноябрь кунлари Хитой республикаси давлат кенгаши бош вазири Ли Кетсяннинг Ўзбекистонга амалга оширган расмий ташрифи давомида Ўзбекистондан Хитойга янги узилган анорни экспорт қилиш ҳамда маҳсулотларни автотранспортда учинчи мамлакат ҳудудидан транзит орқали Хитойга экспорт қилиш бўйича келишувлар имзоланган эди. Шу асосда, экспортёрлар эндиликда ерёнғоқни ҳам Қозоғистондан «Харгос» ва «Алашанкоу», Қирғизистондан «Иркештам» ва «Тургарт» чегара ўтказиш пунктлари орқали Хитойга автотранспортда олиб ўтиш мумкин. Маълумот учун, ҳозирги кунга қадар Ўзбекистондан Хитойга 13 турдаги қишлоқ хўжалиги маҳсулотини экспорт қилишга рухсат олинган. Айни пайтда қўшимча равишда 11 турдаги маҳсулот экспортига рухсат олиш бўйича музокаралар давом этмоқда. Узум, лимон, олхўри, шафтоли, ўрик, ловия, тариқ, шунингдек, қуритилган маҳсулотлардан аччиқ қалампир, олча, олхўри, қовун экспорти учун рухсат олиниши кутилмоқда.