НОГИРОН АЁЛНИ ХЎРЛАМА! ХУДОНИНГ ҒАЗАБИГА УЧРАЙСАН! (ёхуд Бухоро интернатидаги ноинсофлар)
Бухородаги интернатда ногирон аёлларни муддати ўтган дорилар билан даволашаркан…
Бухоро шаҳрида жойлашган «Меҳрибонлик» ногирон аёллар интернати беморларини йиллаб муддати ўтган дорилар билан даволаб келишган. Интернатдаги ҳамшираларнинг гапига қараганда, руҳий хаста аёллар яроқсиз дорилар истеъмол қилгани етмай, кир-чир кўрпа-тўшакларда ухлашади, йиртиқ-ямоқ кийимларда юришади.
Ўша ҳамширалар тақдим этган суратларда «Алоэ», «Флусам» дори воситаларининг ампулалари намойиш этилган. Уларнинг муддати ўтганлиги ёзувларда шундоқ кўриниб турибди. Катта ҳамшира Гулшан Раҳматова қўл остидаги ҳамшираларга шу дорилар билан беморларни даволаш вазифасини қўйган.
Ҳозирги пайтда Бухородаги «Меҳрибонлик» интернатида 250 нафар ногирон аёл даволанмоқда. Уларнинг аксарияти руҳий хаста. Уларга 157 нафар ҳамшира ва санитаркалар кеча-ю кундуз хизмат кўрсатишади.
Ҳамширалардан бири айтдики, интернатда йиллар давомида дори ўғирлаш ҳолатлари кузатиб келинган. Беморларга ўта сифатсиз овқатлар берилади. Уларни кир-чир кўрпаларда ухлашга, йиртиқ-ямоқ кийимларда юришга мажбур этишади. Тўғри, ҳамшираларнинг оммавий тарзда қилган шикоятидан сўнг Бухоро вилоят соғлиқни сақлаш бошқармасидагилар текширишга келишган. Лекин асосий айбдорлар барибир ишдан ҳайдалмади.
— Катта ҳамшира бизни мажбурлаб, — дейди ҳамширалардан бири. — Ҳисоботда қиммат дориларнинг номини ёздирарди. Биз бир нечта мутасадди ташкилотларга шикоят қилдик. Лекин интернат раҳбарлари нима қилиб бўлмасин сувдан қуруқ чиқишмоқда.
Бошқа бир ҳамширанинг айтишича, худди ўша катта ҳамшира уларни мажбурлаган ҳолда беморларга муддати ўтиб, аллақачон яроқсиз ҳолга келган уколларни қилдираркан.
— Яқиндагина биз беморларга «Алоэ» уколи қилишни тўхтатдик, — деди у. — Шунгаям икки ҳафтадан ошди. Биз ўша эскирган дориларни суратга олганмиз. Масалан, шу йил август ойида уч нафар беморимиз оламдан ўтди. Лекин ҳужжатда уларни кексалик ва хасталик туфайли ўлим топди деб ёзишган. Ваҳоланки, уларга ҳам ўша яроқсиз уколлар қилинганди. Шунинг учун биз уччала бемор ҳам эскирган дорилар туфайли ўлган деб ҳисоблаймиз…
Ҳамшира яна бир ғалати гапни айтди. Унинг гапига қараганда, Баҳодир Олтиев аллақачон интернат директори лавозимидан четлатилган бўлса-да, барибир ҳозир ҳам интернатни бошқаришда давом этяпти экан.
— Баҳодир Олтиевни директор лавозимидан олиб ташлашганига уч ой бўлди, — деди ҳамшира. — Лекин интернатда ҳеч нарса ижобий тарафга ўзгармади. Чунки ўша Баҳодир Олтиевни интернатдаги ҳомийлар кенгашига раис этиб тайинлашган. Ҳар куни шу ерда. Унинг ўрнига тайинланган янги директор Алимардон Бобоев Баҳодир аканинг кўрсатмасисиз бир қадам ҳам босмайди. Тўғри, интернатда ҳозир эскирган дорилардан фойдаланиш тўхтатилди. Беморларнинг кўрпа-тўшакларини янгилашга тушишган. Бироқ асосий айбдорлар бўлмиш катта ҳамшира ва хўжалик ишлари бўйича мудир ўз лавозимида қолди. Олтиев уларни муаммо ҳал бўлиб, босди-босди бўлгунга қадар меҳнат таътилига чиқариб юборган.
Интернат санитаркаларидан бири шундай дейди:
— Комиссия келадиган бўлса, дарров беморларга янги кийим кийдиришади. Кетиши билан ечиб олиб яна эски кийимларни кийдиришади. Яқинда бош ошпазни ошхонадан уйига бир тоғора гўшт, гуруч ва макарон ўғирлаб кетаётганда тутиб олишди. Лекин унга нисбатан ҳеч қандай жазо чораси кўрилмади. Бош ошпаз ишлашда давом этмоқда. У катта ҳамширанинг туғишган акаси. Шуниям одамлар билсин. Меҳнат кодекси бир ташкилотда қариндошлар бирга ишлашини тақиқлайди. Афсуски, бу қонун бизнинг интернатда ўз кучига эга эмас.
Яна катта ҳамшира ҳақида гапирсам. Интернат бўйича уни ҳамма ёмон кўради. У 11 йилдан бери шу ерда ишлайди. Жуда устамон бўлиб кетган. Ёши улуғ беморларга ҳам дўқ аралаш муносабат юритади. Ҳамшираларнинг ўзига яқинларинигина мақтайди, тақдирлайди, олқишлайди. Тажрибали, қўли енгил ҳамширалар бир четда қолиб кетаверади. Қаранг, ўтган йили 31 декабр куни шаҳар ҳокимиятидан беморлар учун 500 та Янги йил совғаларини юборишганди. Катта ҳамшира хўжалик ишлари бўйича «катта опа»миз беморларга фақат биттадан олма, биттадан печенье қолдириб, қолганларини ўзлари бўлиб олишган. Шундай одамлардан яхшилик кутиб бўладими?
АСТАҒФИРИЛЛО!!!
ca-news. org