«Усмонийлар империяси тарихи» туркумидан: «Муҳташам юз йил» сериалидаги бош роллар ижрочилари қанчадан ҳақ олган?..
Маълумки, бу дунёда нимаики иш қилсак, албатта моддий манфаат биринчи ўринда туради. Ишлашимизнинг сабаби ҳам моддий аҳволимизни яхшилаш, оч қолмаслик, орзу-ҳавасларга етишдан иборат. Турк киноижодкорлари тарафидан суратга олиниб, бутун дунёни ҳайратга сола олган «Муҳташам юз йил» сериалида суратга тушган асосий актёрлар ҳам юқорида таъкидлаганимиздек, тирикчилик учун ишлашади. Хўш, бош ролларни ижро этганлар қанчадан ҳақ олишган? Буни Иброҳим роли ижрочиси актёр Окан Ялабикдан бошлаймиз. Айтишларича, актёрга дастлаб ҳар бир серия учун 8 000 лирадан ҳақ тўлашган. Шубҳасиз, бундан актёр жуда норози бўлган. Чунки шундай оғир меҳнат учун бу пул кулгили. Продюсерларга ўз норозилигини билдираркан, «Ё ҳақни оширинглар, ё Иброҳимни ўлдиринглар», деган гапларни айтган. Шундан кейин ҳам продюсерлар актёрга ҳар бир серия учун атиги 15 000 лирадан ҳақ тўлай бошлашган.
Шубҳасиз, гонорарнинг каттасини Сулаймон роли ижрочиси Холид Эрганч олган. Унга ҳар бир серия учун 45 000 лирадан гонорар беришган. Хуррам султонни ўйнаган Марям Узерли-чи? Бу актриса Германияда яшайди. Сериалда суратга тушиш учун атайин Туркияга келиб узоқ вақт қолиб кетган. Қаранг, унга ҳам худди Окан Ялабик каби ҳар бир серия учун 8 000 лирадан тўлашаётган экан. Ҳамкасбининг қатъий ҳаракатларига гувоҳ бўлгач, Марям хоним ҳам продюсерларга шарт қўйган. Шартдан кейин унга ҳар бир серия учун 35 000 лирадан гонорар тўлашни бошлашган. Ана энди қолган роллар ижрочилари қанча ҳақ олганини ўзингиз ҳисоблаб олаверинг. Миллиардлаб долларлар фойда келтирган ва келтиришда давом этаётган шундай машҳур сериалда суратга тушган актёрларга қўполроқ айтганда, қандайдир тийинларни ҳақ сифатида тўлашган. Астағфирилло!!!
Олимжон ҲАЙИТ тайёрлади