Aндрей Фёдоров: Барча ўйинларни 2:1 ҳисобидаги ғалаба билан якунлашга ҳам йўқ демасдим
???? Каналга қўшилинг! ????
https://t.me/joinchat/AAAAADwt0NGCRoONT4f1_Q
Хабарингиз бор бугун Суперлиганинг 1-тури доирасида “Локомотив” ўз майдонида “Андижон”ни қабул қилди ва 2:1 ҳисобида ғалаба қозонди. Ўйиндан сўнг ўтказилган матбуот анжуманининг иккинчи қисмида мезбонлар бош мураббийи Aндрей Фёдоров ўз фикрлари билан ўртоқлашди. – Барчани бошланган янги мавсум билан табриклайман. Ўйин тугаганидан кейин кийиниш хонасида Йигитларга фақатгина натижа ёққанини айтдим. Мавсум бошланишидан олдин барча жамоалар 1-турда юқори куч билан тушишини кутгандим. Бугун кўплаб вазиятлар яратганимиз мени қувонтирди. Ўйин сифатини яхшилаш борасида кўплаб ишлар олиб боргандик. Жамоанинг катта қисми ўзгарган. Улар ҳали жамоа тарзида шакллана олишмади. Шу боисдан қўлга киритилган қийин ғалаба билан уларни табриклайман. Олдиндаги катта мавсумни ғалаба билан бошлаганимиз уларга рухий далда бўлади. – Жамоа “Истиқлол”га қарши ўйинда кичик ҳисобда ютқазди. Бугун эса кичик ҳисобдаги ғалаба. Нима деб ўйлайсиз натижа алдамчи бўлиши мумкинми? – Мен ҳам жамоанинг ўйинлари бундан-да яхши бўлишини истайман. Бу фақатгина 1-тур. Олдинда катта мавсум бизни кутиб турибди. Барча ўйинларни 2:1 ҳисобидаги ғалаба билан якунлашга ҳам йўқ демасдим. – “Локомотив” биринчи таймда, “Aндижон” еса иккинчи бўлимда яхши ўйнади. Ёки иккинчи бўлимда “Локомотив” “Aндижон”дан кўра ёмон ўйнади деган фикр тўғрими? – “Локомотив” иккинчи бўлимда “Aндижон”дан кўра ёмон ўйнамади. 2:0дан кейин биз ўйинни қайта қуришни бошладик. Иккинчи бўлимда йигитларнинг олдига қўйган мақсад ўзгарди ва бошқача тактикаларни ишлатдик. Рақибнинг голидан кейин еса натижани ушлаб қолиш учун ҳаракат қилдик. – “Локомотив”нинг марказидаги футболчилар кучсизроқ. Жамоа шу ярим ҳимоячилар билан чемпионлик учун кураша оладими? – Бошида айтганимдек, ҳар қандай ҳолатда ҳам биз чемпионлик учун курашамиз. Мен учун энг яхши футболчилар жамоамдагилар. Ҳар доим кўп нарса, яъни, тайёргарлик, ўйиннинг кайфияти, рухи рақибнинг савиясига боғлиқ бўлади. Масалан, футболчиларга ҳам бошқача вазифалар топширилади. Жамоадагиларнинг имконияти юқори. Мавсум давомида бундан унумли фойдаланамиз. – Кахи Махарадзе марказда яхши ўйин кўрсатарди. Нима учун уни айнан марказий ҳимояда ўйнатяпсиз? – Кахи жамоанинг энг тажрибали футболчилардан бири. У ҳали ўзининг юқори жисмоний ҳолатига кира олмади. У қайси позиция бўлса ҳам юқори савияда ўйнайди. Ҳозирча у ўйинларга тўлиқлигича тайёр эмас. У билан бу борада ишлаяпмиз. – “Локомотив” келаси турда “Навбаҳор” майдонига сафар уюштиради ва ўйинда аншлаг бўлиши кутилмоқда. Ушбу ўйиндан нималарни кутяпсиз? – “Навбаҳор”га қарши ажойиб ўйин бўлишини кутяпман. Сўнгги йилларда “Навбаҳор”да катта ўсиш бўлди. Мухлислар эса жамоага катта куч бермоқда. Намангандаги ўйин мухлисларга катта завқ бериши аниқ.