Марҳум актриса Гавҳар Шарипованинг онаси: Гавҳар Навоийнинг ҳавоси мени бўғади, менга ҳаво етишмайди дерди (видео) — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: «Дарё» «Опа-сингиллар», «Гулхан атрофидагилар», «Алпомиш» каби фильмларидаги роллари билан машҳурликка эришган, 2019 йилнинг охирида бахтсиз ҳодиса туфайли оламдан ўтган актриса Гавҳар Шарипованинг онаси Дилором Шарипова «Дарё» нашрига интервью берди. Интервьюни «Дарё» мухбири Феруз Муҳаммад ташкиллаштирди. Дилором Шарипова қизининг болалиги, актриса бўламан деб қилган ҳаракатлари, «имтиҳондан қизимни йиқитиб юборинглар», дея институт ўқитувчиларига қилган илтимоси ҳақида гапириб берди. - Гавҳар қизим боғчага борган вақтларидан, уч ёшларидан турли юпкачаларни кийиб, актриса бўламан дер эди. ‘Бундай дема-эй, актриса бизни зотимизда йўқ’, дердим. Мактабда ҳам жуда яхши ўқиганди. Айниқса устозлари Гавҳар томонидан ташкиллаштирилган сўнгги қўнғироқни, ҳар бир ўқитувчисига шеър ёзганини ҳозиргача эслашади. ‘Менга оқ фотиҳа беринг, мен санъат институтига кираман’,— деганида, ‘жоним болам, сени отасиз катта қилдим, ўзбекчилик, одамлар актриса бўлиб кетибди’,— деб гапиришади, десам, ‘Сора Эшонтўраева етти ёшимда сен саҳна учун туғилгансан, актриса бўласан, дегандилар, ҳамма томонлама қобилятим етарли, барибир актриса бўламан’ деганди. Институтга ҳужжатларини топширганида ҳам, ижодий имтиҳон оладиган устозларига ‘айланай сизлардан, Навоийдан келган Шарипова Гавҳарни имтиҳондан йиқитиб юборинглар’ деб илтимос қилдим. Имтиҳонда унинг маҳоратини кўрган устозлари, ёнимга келиб, ‘қизингиз саҳна учун туғилган экан-ку, ҳали у машҳур актриса бўлиб кетади, бизни дуо қилиб, раҳмат айтиб юрасиз’ дейишган эди. Гавҳар юқори натижалар билан ўқишга кирган эди. Биринчи марта Рашид Холиқовнинг видео клипида суратга тушганди. Кейин ‘Алпомиш’ фильмига, ‘Оталар сўзи’ дастурида суратга тушиб юрди. Театрда жуда кўп спектаклларда роллар ўйнади. ‘Гулхан атрофидагилар’ фильмида ҳам жуда чиройли роль ижро этган. Кейинроқ ‘Опа-сингиллар’ сериалига таклиф қилишган экан. Бир кун телефон қилиб, ‘фалон куни ‘Опа-сингиллар’нинг биринчи фасли кетади, кўринглар, фақат йиғламанглар’ деди. ‘Опа-сингилларни’ йиғлаб-йиғлаб кўрдик. ‘Опа-сингиллар’ сериалидан кейин иши ўхшамадими, дугонаси Москвага чақирган эди, кейин у ерга ишлашга кетди. Москвадан уйга келганида, ‘Навоийда қол’, десам, ‘мен Навоийда яшай олмайман, мени ижодим Тошкентда, Навоийнинг ҳавоси мени бўғади, менга ҳаво етишмайди’ деганди. Ҳаммамизга меҳрибон эди, ‘ишларим яхши бўлиб кетса Тошкентдан уй оламан, сизни олиб кетиб шифокорларга кўрсатаман, сиз йиғламанг, ҳаммаси яхши бўлади, онажон’ дерди. Болажонимдан айрилиб қолдим. Мени болам кенг дунёга сиғмай кетди, - дейди актриса Гавҳар Шарипованинг онаси Дилором Шарипова. Маълумот учун, актриса Гавҳар Шарипова 1980 йилда Навоий шаҳрида туғилган бўлиб, «Алданган аёл», «Гўзаллик сири», «Алпомиш», «Гулхан атрофидагилар», «Сарвиноз» каби фильмларда ҳам турли даражадаги ролларни ижро этган. Актриса Гавҳар Шарипова 2019 йилнинг 19 ноябрь куни Самарқанд—Ғузор автомобиль йўлида, Isuzu юк машинасида келаётганда, мазкур юк машинаси ҳайдовчиси шилқимлик қилган, шундан сўнг актриса 140 километр тезликда юриб кетаётган машинадан ўзини ташлаб вафот этган.