Ҳиндистондаги авиаҳалокатда камида 15 киши нобуд бўлди
Дубайдан учиб келаётган "Эйр Индиа Экспресс" авиаширкати учоғи 7 август куни Ҳиндистон жанубий-шарқидаги Керала штати аэропортига қўниш чоғида қулаб тушди. Авиаҳалокат чоғида, расмий маълумотларга кўра, камида 15 киши ҳаётдан кўз юмган.
Хабарларга кўра, учоқ бортида 200 чоғли йўловчи ва экипаж аъзолари бўлган. Йўловчиларнинг аксарияти пул топиш учун Дубайга борган ва эндиликда ватанига қайтиб келаётган ҳиндистонликлар бўлгани айтилмоқда.
Ҳодиса жойида олинган видеокадрлар учоқнинг учиш-қўниш йўлагидан чиқиб кетиб, қияликдан қулаганидан дарак бермоқда. Авиаҳалокат натижасида учоқ фюзеляжи иккига бўлиниб кетган.
Ҳозирда авиаҳалокат содир бўлган жойда қутқарув ишлари, қурбон бўлганларнинг шахсини аниқлаш ва жароҳатланганларга кўмак кўрсатиш ишлари давом этмоқда.