Ҳаити президенти Жовенел Моиз уйида отиб кетилди
Ҳаити президенти Жовенел Моиз номаълум шахслар томонидан ўз уйида отиб кетилди. Ҳужум чоғида биринчи хоним Мартина ҳам яраланган, дея маълум қилган собиқ бош вазир Клод Жозеф. У давлат раҳбари вазифасини бажаришни бошлаганини билдирган.
Душанба куни Клод Жозефнинг ўрнига бошқа бош вазир – Ариэль Анри тайинланган. Ҳукуматнинг янги раҳбари вазият юзасидан ҳали изоҳ берганича йўқ.
Ҳаити жаҳондаги энг қашшоқ мамлакатлардан бири бўлиб ҳисобланади. Бу мамлакат расмийлари қуролли тўдалар томонидан назорат қилинадиган кўчаларда тартиб ўрнатишга муваффақ бўлолмаётганлари учун танқидга учраб келадилар. 53 ёшли Моиз биринчи босқичи 2015 йилда, иккинчи босқичи эса 2016 йилда бўлиб ўтган президент сайлови натижасида ҳокимият тепасига келганди.
2018 йил октябрида Ҳаити асосчиси Жан-Жак Дессалин ўлимининг 212 йиллигига бағишланган маросим чоғида президент Моиз ўққа тутилганди. Ўша пайтда у жиддий жароҳат олмаган ва хавфсиз жойга кўчирилганди. Мазкур воқеа чоғида президент қўриқчиларидан уч нафари яраланган.
Шу йил март ойида Ҳаитида Моиз томонидан таклиф қилинган Конституцияга ўзгартишларга қарши норозилик намойишлари бўлиб ўтганди. Президент таклиф қилган чоралар орасида бош вазир лавозимини бекор қилиш, парламент юқори палатасини (сенат) тарқатиб юбориш ва президентга қаторасига икки марта беш йиллик муддатга сайланишга рухсат бериш (амалдаги қонунчиликка кўра президент биринчи беш йиллик муддатдан кейин лавозимдан кетиб, бир муддат танаффусдан кейин яна президентликка номзодини қўйиши мумкин) кабилар бор эди. Конституцияга ўзгартишлар киритиш бўйича референдум аввалроқ шу йилнинг 27 июнига белгиланган, бироқ кейинчалик номаълум муддатга қолдирилган эди.