Бола туғилганда бериладиган “суюнчи пули”ни энди исталган кўринишда олиш мумкин

“Вазирлар Маҳкамасининг қарори билан тасдиқланган Туғилганликни қайд этиш билан боғлиқ комплекс давлат хизматларини кўрсатишнинг маъмурий регламентига асосан фарзанд туғилганда бериладиган бир марталик нафақа тўлови Халқ банки томонидан нақд пул шаклида амалга оширилмоқда. Бу эса ФҲДЁ бўлимларида жойлашган банк кассалари олдида узундан узун навбатларни юзага келтираётган эди.

Давлат хизматлари агентлиги томонидан фуқароларга янада қулайлик яратиш мақсадида, “ФҲДЁнинг ягона электрон архиви” ахборот тизимида фарзанд туғилганда бериладиган бир марталик нафақа тўловини (“суюнчи пули”) ота-онадан бирининг банк пластик картасига ихтиёрийлик асосида ўтказиб бериш имконияти яратилди”, дейилади Давлат хизматлари агентлиги ахборотида.

Қайд этилишича, ФҲДЁ бўлимининг масъул ходими ота ёки онанинг хоҳишига асосан фаол ҳолатда бўлган банк пластик картасини махсус белги орқали танлайди ва бир марталик тўловни банк пластик картасига йўналтиради. Халқ банки томонидан “суюнчи пули” қисқа муддатда фуқаронинг банк пластик картасига ўтказиб берилади.

ДХА ахборот хизмати раҳбари Севара Зокированинг Kun.uz’га маълум қилишича, ушбу янгилик агентликка бўлаётган мурожаатларни таҳлил қилган ҳолда фуқароларнинг талабини қондириш мақсадида жорий этилмоқда. Истаганлар суюнчи пулини нақд шаклда олиши ёки тўлов ота-оналардан бирининг банк пластик карточкасига ўтказиб берилиши мумкин. “Ҳеч ким қайсидир тўлов усулига мажбурланмайди”, деди агентлик расмийси.

Аввалроқ карантин пайтида “суюнчи пули”ни қандай олиш бўйича мурожаатлар сони кўпайган, Давлат хизматлари агентлиги ушбу бир марталик нафақани бола туғилган кундан бошлаб 6 ой ичида олиш мумкинлигини маълум қилганди.

Маълумот учун, фарзанд туғилганда бериладиган бир марталик нафақа суммаси меҳнатга ҳақ тўлашнинг энг кам миқдори 70,3 фоизи – бугунги кунда бу – 577 866 сўмни ташкил этади.