Байден Путинни Украинага бостириб кирилгани тақдирда “қаттиқ жавоб” берилиши ҳақида огоҳлантирди
АҚШ президенти Жо Байден россиялик ҳамкасби Владимир Путин билан бир соатлик телефон мулоқотида уни Россиянинг Украинага бостириб кириши оғир оқибатларга олиб келишидан огоҳлантирди.
"АҚШ ўз иттифоқчилари билан бирга қатъий жавоб қайтариб, тезда Россияни жуда оғир тўловга мажбур қилади”, — дейилади шанба куни ўтказилган музокаралардан сўнг эълон қилинган Оқ уй хабарида.
АҚШ маъмуриятининг таъкидича, Байден президент Путинга Қўшма Штатлар дипломатияни давом эттиришга тайёрлигини аниқ айтган, аммо "бошқа сценарийларга ҳам тайёр" эканини Россия президентига етказган.
Кремль Байден билан суҳбат мазмунини ҳозирча изоҳламади.
Аввалроқ Оқ уй шанба куни телефон суҳбати ўтказилишини талаб қилган Америка томони бўлгани, Россия эса душанба куни видеоконференция ўтказишни таклиф қилгани ҳақида хабар берган эди.
Путин ва Байден охирги марта декабрь ойида телефон орқали гаплашган.
Ўша ойнинг бошида улар видеоконференция ўтказдилар.
Путин ва Байденнинг президентлар сифатидаги биринчи юзма-юз учрашуви 2021 йил июнь ойида Женевада бўлиб ўтган эди.