Байден Маскнинг АҚШ иқтисодиёти ҳақидаги танқидига жавобан Ойга парвоз қилишда омад тилади — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: AP Photo Tesla ва SpaceX асосчиси Илон Маск АҚШ иқтисодиёти борасида «кўнгли ёмон нарсаларни сезаётгани» ҳақида маълум қилгач, АҚШ президенти Жо Байден унга «Ойга парвоз қилишда омад» тилади. Бу ҳақда «РБК» хабар бермоқда. Аввалроқ Reuters Маскнинг Tesla ходимларига қаратилган баёнотини эълон қилганди. Унда тадбиркор АҚШ иқтисодиёти бўйича «кўнгли ёмон нарсаларни сезаётгани»ни ва ходимларнинг 10 фоизини қисқартиришга мажбур бўлаётганини айтган. «Эътибор беринг, бу автомобиль, аккумуляторлар ишлаб чиқарадиганлар ва қуёш батареяларини ўрнатадиганларга тааллуқли эмас», — дея аниқлик киритди Маск электрон хатида. Reuters маълумотларига кўра, 2021 йил охирида Tesla ва унинг шўъба компанияларида қарийб 100 минг киши ишлаётган эди. Иқтисодий вазиятга бағишланган матбуот анжумани чоғида журналистлар Байдендан Tesla асосчисининг АҚШ иқтисодиёти борасидаги фикрига қандай қараши ҳақида сўради. «Илон Маск бу ҳақда гапираётган пайтда Ford инвестицияларини оширмоқда, янги электромобиллар яратишга 6 минг нафар янги ходимни жалб қилмоқда… Собиқ Chrysler, ҳозирги Stellantis корпорацияси ҳам электромобилларга инвестицияларни кўпайтирмоқда. Intel компьютер чиплари ишлаб чиқариш учун 20 мингта янги иш ўринларини яратмоқда. Шундай экан, унга (Илон Маск)ка Ойга саёҳатида омад тилайман», — дея жавоб қилди АҚШ президенти. Март ойида АҚШда йиллик инфляция 8,5 фоизга етди, бир ой аввал у 7,9 фоизга тенг эди. Ушбу кўрсаткич 1981 йил декабридан буён рекорд рақамга айланди.