Ногиронлиги бўлган абитуриентларни онлайн рўйхатга олишда янгилик бор
Айни пайтда олий таълим муассасаларининг бакалавриат таълим йўналишларига абитуриентларни рўйхатга олиш Давлат тест марказининг my.dtm.uz сайти орқали онлайн амалга оширилмоқда.
Бунда ногиронлиги бўлган абитуриентларнинг ногиронлик бўйича маълумотлари Республика тиббий-ижтимоий экспертиза инспекциясининг базаси – “ТМЕК” дастуридан реал вақт режимида олинмоқда.
Лекин айрим ногиронлиги бўлган абитуриентларнинг маълумотлари “ТМЕК” дастуридан реал вақт режимида келмаётгани сабабли my.dtm.uz сайтида ногиронлик бўйича имтиёз маълумотларини киритиш имконияти яратилди. Бу ҳақда ДТМ хабар қилди.
«Агар Сизнинг ногиронлик бўйича маълумотларингиз “Менинг имтиёзларим” бўлимида чиқмаётган бўлса, “Ногиронлик тўғрисида маълумотнома” бўлимига кириб, ўз ногиронлик маълумотларингизни киритишингиз мумкин.
Агар Сизда кўзи ожиз тоифасидаги ногиронлик мавжуд бўлса, ногиронлик маълумотларини киритиш билан бирга “Кўзи ожиз” белгисини белгилашни унутманг», – дейилади хабарда.
Киритилган маълумотлар Республика тиббий-ижтимоий экспертиза инспекциясига юборилади ва маълумотлари тасдиқланган абитуриентларнинг имтиёзи инобатга олинади.