Туғуруқхонада 33 ёшли аёл вафот этди. Берморга қараган ҳамма ходимларга интизомий чоралар кўрил
Фарғона вилоятининг Бешариқ туманида туғуруқхонага олиб борилган 33 ёшли аёл вафот этди. Бу ҳақда»Millar» дастурида хабар қилинди.
Маълум қилинишича, аёл туғуруқхонага соат 08:30 ларда олиб борилган, шифокорлар соат 15:00 ларда операция қилиш лозимлигини, бола нобуд бўлгани ва бачадонни ҳам олиб ташлаш кераклигини айтишган. Операциядан кейин аёлни бошқа жойга кўчиришга рухсат берилмаган.
«Бу аёлнинг буйраги ишламаяпти, зудлик билан диализ қилишимиз керак, сизларга Қўқон яхши, деди дўхтирлар. Буйраги ишламаётганини операцияда кўрган экан, нега Тошкент, Фарғона ёки Қўқонга олиб кетиш учун рухсат сўраганимда бермади? Ёмон ҳолатда, кўчанинг машинасида, кеч келган, деди. Суд-экспертиза хулосасида ҳам аёл оғир ҳолатда келган дейиляпти. Аслида унақа ҳолат йўқ эди», – дейди марҳуманинг турмуш ўртоғи.
Маълум бўлишича, аёлнинг бундан аввал қиз фарзанди бўлган ва орадан саккиз йил ўтиб, яна бир фарзандини дунёга келтирмоқчи бўлган.
Туман перинатал маркази бўлими мудири Сорахон Аюбхўжаеванинг маълум қилишича, ўша куни берморга қараган ҳамма ходимларга интизомий чоралар кўрилган. Ҳозирда ҳолат юзасидан Қўқон шаҳар прокуратураси томонидан тергов ҳаракатлари олиб борилмоқда.