Ўзбекистонда 10 минг долларгача бўлган тақинчоқларни хорижга олиб чиқишга рухсат берилади
Ўзбекистонда шу йил 1 декабридан бошлаб қиймати 10 минг долларгача бўлган заргарлик буюмларини четга олиб чиқишга рухсат берилади. Бу ҳақда президент Шавкат Мирзиёев раислигида саноатни ривожлантириш масалаларига бағишланиб 7 ноябрь куни ўтказилган видеоселектор йиғилишида айтилган.
Шу кунгача Ўзбекистондан қиймати 5 минг долларгача бўлган қимматбаҳо тақинчоқларни олиб чиқиб кетишга рухсат этилганди.
Йиғилишда кейинги ойдан олтин, кумуш ва заргарлик учун зарур бошқа хом ашёларни қайта ишлаш учун вақтинча олиб кириш ва олиб чиқишда лицензия талаби бекор қилиниши айтилган.
Шунингдек, эндиликда заргарлар ишлатадиган қимматбаҳо ва безак тошлари божхона тўловларидан озод қилиниши қайд этилган.
Видеоселекторда Самарқанд, Бухоро ва Фарғона вилоятлари ҳокимларига Самарқанд, Бухоро ва Қўқон шаҳарларида заргарлик савдо ва ишлаб чиқариш мажмуаларини ишга тушириш топширилган.